luns, 20 set 2010
O tenente de alcalde, Santi Domínguez, e o concelleiro de Deportes, Xabier Alonso, mantiveron hoxe unha xuntaza co presidente do Celta, Carlos Mouriño, e o vicepresidente Ricardo Barros, para analizar a situación dos proxectos da remodelación do estadio de Balaídos e da cesión do campo de Barreiro para uso dos equipos de Lavadores. Santi Domínguez explicou que a reforma de Balaídos está pendente da decisión sobre a sede do Mundial do 2018 ou 2022 á candidatura ibérica España-Portugal e anunciou que se están producindo avances con respecto a Barreiro.
venres, 17 set 2010
O concelleiro de Deportes, Xabier Alonso, presentou hoxe a primeira edición da Xornada Siareira, que se celebrará no hotel Coia ao longo do vindeiro día 25 e que pretende "achegar os clubs aos siareiros", segundo dixo. "É un sector do deporte que non se visibiliza e queremos dar voz aos que non a teñen para que fagan chegar as súas preocupacións e suxestións", explicou o concelleiro e presidente da Fundación VIDE.
mércores, 15 set 2010
A segunda edición do Medio Maratón Cidade de Vigo xa está en marcha. O concelleiro de Deportes, Xabier Alonso, presentou hoxe o evento xunto co organizador, Omar Lorenzo, e os patrocinadores privados, Ibercaja e Coca-Cola. A carreira atlética, tamén pertencente ao Circuíto Cidade de Vigo de carreiras populares, está programada para o vindeiro día 26, con peche de inscrición o día 22. O prezo para participar será este ano de 10 euros e a organización, Prime Time, aspira a ter en liña de saída a uns 450 deportistas.
mércores, 15 set 2010
O concelleiro de Deportes, Xabier Alonso, recibiu hoxe aos equipos infantís masculino e feminino do Seis do Nadal-Coia de baloncesto, protagonistas dunha grande final da tempada pasada. O Seis do Nadal meteuse por vez primeira na súa historia nunha fase final do campionato estatal masculino e as mozas chegaron ata o interautonómico.
xoves, 9 set 2010
O concelleiro de Deportes, Xabier Alonso, recibiu hoxe no Concello a Jorge Casales, novo campión de Europa xuvenil de trial, ao que felicitou polos éxitos acadados este verán. Casales, vigués de 15 anos, gañou o Europeo da súa idade ao imporse en Coazze (Italia) e La Rabassa (Andorra), acabando segundo en Tanvald (Chequia).
mércores, 8 set 2010
O concelleiro de Deportes, Xabier Alonso, sostivo hoxe ante os medios de comunicación que deportistas como Susana Rodríguez, triatleta viguesa invidente, son "un exemplo" para a sociedade, e afirmou sentirse feliz "pola gran cantidade e calidade de grandes deportistas que esta cidade está a dar".
martes, 7 set 2010
O concelleiro de Deportes, Xabier Alonso, recibiu hoxe no seu despacho a Sebastián Rodríguez, "Chano", polos seus éxitos nos Mundiais de Natación de Eindhoven (Holanda). O concelleiro nacionalista felicitou a Chano "polos seus resultados en Holanda" e animouno a seguir por este camiño en Londres 2012. "Irás a Londres, non si?", bromeou o concelleiro con Chano.
luns, 30 ago 2010
O concelleiro de Deportes, Xabier Alonso, fixo este luns un chamamento a presenciar o Trofeo Cidade de Vigo de Fútbol Sala, que se celebrará este mércores ás 21 horas entre F.C. Coruxo e o Lobelle Santiago na pista central do polideportivo de As Travesas. Avanzou que ás 18 horas, na coñecida como "pista vermella" deste polideportivo, terá lugar un campus de fútbol sala gratuito, destinado a fomentar a práctica deste deporte entre os rapaces.
venres, 20 ago 2010
O Real Club Celta medirase ao Real Zaragoza nun choque cualificado polo concelleiro de Deportes, Xabier Alonso, como "de Primeira División", este sábado no XL Trofeo Cidade de Vigo de fútbol. Será unha nova edición a partido único, como sucede dende 1997, e que se xogará ás 22 horas no estadio municipal de Balaídos (TVG). A presentación do evento tivo lugar no Concello coa presencia da tradicional "uve" para o gañador e os demais trofeos en xogo.
mércores, 18 ago 2010
O concelleiro de Deportes, Xabier Alonso, anunciou este mércores que as escolas deportivas municipais ten programado o ensino de 28 modalidades deportivas, ofertando máis de 5.000 prazas para nenos e nenas empadroados en Vigo e nacidos entre 1994 e 2004, así como tres programas para adultos maiores de 18 anos (defensa persoal, tenis de mesa e tiro con arco) e baloncesto e natación para persoas con discapacidade física e psíquica. O novo curso comezará o 1 de outubro e prolongaranse durante oito meses ata o 28 de maio do 2011.
