mércores, 30 xuñ 2010
O Mundial Universitario de Taekwondo xa está en marcha coa competición de pumse (técnica). A cerimonia inaugural tivo lugar hoxe no pavillón das Travesas coa presenza de Santi Domínguez, tenente alcalde de Vigo e presidente honorífico do comité organizador; Xabier Alonso, concelleiro de Deportes da cidade; Xosé Henrique Costas, vicerreitor de Extensión Universitaria; José Ramón Lete, secretario xeral para ou Deporte; e Kemal Tamer, membro do comité executivo da FISU. Tamén estiveron presentes os presidentes da federacións Galega e Española, Mercé Barrientos e Jesús Castellanos.
martes, 29 xuñ 2010
O XI Campionato do Mundo Universitario de Taekwondo presentouse hoxe con todas as expectativas deportivas superadas. A organización calculaba hai unhas semanas que habería uns 450 participantes e finalmente serán uns 600. O tenente de alcalde, Santi Domínguez, celebrou que "Vigo é imparable, bate marcas e seguirá facéndoo. Pero ademais do deportivo, do que non dubidaba, hai máxima ocupación hostaleira con cinco hoteis cheos, e este evento coincide co campionato de billar, co que o retorno ecónomico será moi importante para a cidade".
xoves, 24 xuñ 2010
O concelleiro de Deportes, Xabier Alonso, presentou este venres o Campionato de España por Autonomías de Atletismo, que se celebrará nas pistas de atletismo de Balaídos o sábado, 26 de xuño, en horario de mañá e tarde. O nacionalista destacou que esta competición se suma ás distintas iniciativas postas en marcha para recuperar o atletismo en pista de alto nivel, xa que grazas a colaboración de Concello e Federación Galega de Atletismo foi posible executar parte da remodelación demandada polos deportistas.
xoves, 24 xuñ 2010
O tenente de alcalde, Santi Domínguez, asegurou este xoves que a apertura do complexo de auga de Barreiro tras o verán suporá un "cambio definitivo" nas infraestruturas deportivas de Vigo. Na visita que realizou ao complexo, acompañado polo concelleiro de Deportes, Xabier Alonso, e polo equipo técnico encargado da súa construción, o nacionalista anunciou que os usuarios e usuarias terán abonos mensuais en función da súa situación familiar e idade. Puxo como exemplo o abono familiar, que por 45 euros ao mes permitirá o uso libre das instalacións todos os días do ano a catro persoas.
mércores, 23 xuñ 2010
O alcalde de Vigo, Abel Caballero, recibiu onte martes ao plantel do Coruxo, recén ascendido a Segunda División B para felicitalos polo brillante ascenso acadado o pasado domingo na cidade manchega de La Roda. Os xogadores, acompañados polo concelleiro de Deportes, Xabier Alonso, recibiron as felicitacións de Abel Caballero quen lles expresou a todos os membros do equipo o orgullo da cidade polo éxito. O rexedor animounos ademais a seguir traballando para que este ano poidan consolidarse nesta categoría.
mércores, 23 xuñ 2010
O tenente de alcalde, Santi Domínguez, participou hoxe na inauguración das fases finais do Campionato de España de Billar, que terá lugar ata o 26 de xuño, o Spanish Open e o Campiontato Intercontinental de Parellas, que se celebrará mañá e o vernes. O nacionalista destacou no acto celebrado no Ifevi a importancia de potenciar Vigo como sede de "grandes acontecementos deportivos e económicos" e lembrou que estes eventos deixarán na cidade un retorno económico aproximado de 4 millóns de euros.
martes, 22 xuñ 2010
O tenente de alcalde de Vigo e presidente honorífico do comité organizador do X Fórum FISU, Santi Domínguez, felicitouse hoxe pola calidade da organización do evento, segundo datos chegados ao propio comité dos participantes, e case inesperadamente, recibiu un cúmulo de parabéns do Consello Superior de Deportes (CSD) e do CESU, o Comité de Estudo do Deporte Universitario.
martes, 22 xuñ 2010
A Federación Galega de Taekwondo presentou hoxe aos catro deportistas galegos que participarán no Mundial Universitario de Taekwondo de Vigo: Fernando Rascado, Fani Hernández, Juan Fernández e Rebeca Mariño. Eles serán os deportistas, pero ademais tamén haberá presenza no colectivo arbitral, xa que a árbitra viguesa, María Bautista, acaba de ser seleccionada para arbitrar no campionato.
luns, 21 xuñ 2010
Cun cheo case absoluto no auditorio do Centro Social Caixanova, o Forum FISU Vigo 2010 comezou esta mañá con 72 países participantes dos cinco continentes, confirmando o que xa se aventuraba días antes: que este congreso mundial de deporte universitario é marca de asistencia (269 delegados de todo o mundo, entre oficiais e estudantes), o que confirmou á Federación Internacional de Deporte Universitario o valor actual deste encontro do deporte de todo o planeta.
venres, 18 xuñ 2010
O concelleiro de Deportes, Xabier Alonso, fixo este venres un chamamento á participación na XXVII Carreira Nocturna de San Xoán, que sairá o día 23 de xuño ás 21.15 horas dende a praza do Rei. O nacionalista destacou que esta carreira está incluída no Circuíto de Carreiras Populares, e nela os deportistas ademais de disputar a carreira poderán tamén participar na sardiñada prevista ao remate na Praza do Berbés.