xoves, 31 mar 2011
A concelleira de Benestar Social, María Méndez, presentou este xoves os convenios asinados con cinco entidades sen ánimo de lucro da cidade que traballan no campo da discapacidade e a solidariedade internacional, como son as asociacións Doa, Down, Fundación Menela, Asociación de Persoas Xordas de Vigo e Solidariedade Galega co Pobo Saharaui. A edil do BNG salientou que a contía total destes convenios é de 106.300 euros, que supoñen "un empuxe necesario para as asociacións e porque nas subvencións fallan outras administracións".
luns, 14 mar 2011
A Concellería de Benestar Social presentará no pleno do vindeiro luns unha modificación de crédito de 350.000 para poder adquirir e adaptar os locais nos que se vai abrir un novo Centro Municipal de Servizos Sociais e continuar así achegando os servizos á cidadanía e mellorando a atención social. O centro estará na parroquia de Lavadores e nel habilitaranse novas Unidades de Traballo Social, seguindo co proceso de desdobramento que se ven realizando nas últimas semanas.
luns, 14 mar 2011
A concelleira de Benestar Social, María Méndez, fixo este luns balance do dispositivo de frío, aberto o pasado 9 de decembro no pavillón do Berbés, data dende a que rexistrou un total de 2.599 pernoctacións de 147 persoas diferentes. A edil do BNG anunciou ademais a apertura indefinida dun novo piso para mulleres co obxectivo de "dar resposta ás necesidades das mulleres que están na rúa".
xoves, 10 mar 2011
O tenente de alcalde, Santi Domínguez, presentou este xoxes os convenios bianuais asinados pola Tenencia de Alcaldía e a Concellería de Benestar Social coas asociacións Afán, Casa da Caridade, Vida Digna, Hermanos Misioneros e Banco de Alimentos, ás que se lles destinan un total de 150.000 euros. O nacionalista salientou o labor que fan estas entidades na xestión de comedores e reparto de alimentos nunha situación de crise como a actual colaborando coa administración para dar resposta ás necesidades das persoas.
mércores, 9 mar 2011
O tenente de alcalde, Santi Domínguez, e a concelleira de Benestar Social, María Méndez, inauguraron este mércores o remodelado Centro Municipal de Servizos Sociais do Casco Vello, ubicado na praza da Princesa. Segundo o nacionalista, a reforma feita neste centro amosa o compromiso da Tenencia de Alcaldía e a Concellería de Benestar Social na atención ás persoas e a mellora da calidade asistencial.
mércores, 2 mar 2011
A concelleira de Benestar Social, María Méndez, fixo este mércores balance do programa Sereos, de atención ás persoas en risco de exclusión social de cara a súa integración, correspondente ao ano 2010. A concelleira salientou que este programa atendeu a 1.176 persoas ao longo do ano pasado cun orzamento de 100.000 euros, "catro veces máis que no 2007", cando tiña un orzamento de 24.000 euros. A nacionalista destacou tamén que o número de asistencias diarias chega na actualidade ás 300, o triplo que no 2007.
venres, 25 feb 2011
O Fondo Galego de Cooperación e Solidariedade, no que participa o Concello de Vigo a través da Concellería de Benestar Social, reclama que se inclúa a solidariedade internacional nos programas electorais dos partidos políticos que concorran aos comicios locais do vindeiro mes de maio. Ademais, solicita que as agrupacións políticas recollan o compromiso de chegar á dotación dun 0,7% dos seus orzamentos para cooperación internacional.
mércores, 23 feb 2011
A concelleira de Benestar Social, María Méndez, fixo balance este mércores das diferentes actividades de prevención da dependencia que se desenvolveron dentro do programa de Avellentamento Activo e Deporte para Maiores en 2010. Destacou que fronte ás 800 persoas que participaban en iniciativas similares no 2007, ao longo do ano pasado foron 5.462 persoas de máis de 65 anos as que participaron nalgunha das actividades de prevención organizadas.
xoves, 17 feb 2011
A concelleira de Benestar Social, María Méndez, fixo balance este xoves do Servizo de Axuda no Fogar correspondente a 2010. Destacou que o ano pasado foron atendidas 771 persoas, na súa maioría mulleres viúvas, ás que se lles prestou un total de 203.432 horas de servizo. A concelleira nacionalista afirmou que estes datos supoñen un incremento do 47% respecto ao ano anterior, o que, segundo dixo, significa "un logro moi importante da Concellería de Benestar Social no seu obxectivo de mellorar a calidade de vida da cidadanía".
venres, 11 feb 2011
A concelleira de Benestar Social, María Méndez, visitou este venres as instalacións da Asociación das Persoas Xordas de Vigo. Tras a xuntanza que mantivo co seu secretario xeral, Antonio Castro, a concelleira nacionalista anunciou a posta en marcha ao longo do ano dun sistema de comunicación pioneiro en Galiza para que as persoas xordas poidan comunicarse rapidamente coa Policía Local en casos de emerxencia.
