martes, 22 mar 2011
O tenente de alcalde, Santi Domínguez, presentou este martes a programación da Festa da Reconquista 2011, que se celebrará o vindeiro fin de semana, 26 e 27 de marzo. O nacionalista destacou que nesta convocatoria, como continuación á Reconquista do Casco Vello emprendida hai tres anos, a nova Pinacoteca súmase á celebración, xa que as persoas que se acheguen ao barrio histórico de Vigo poderán gozar coas xornadas de portas abertas e visitar a "obra cultural máis importante que se ten feito nos últimos anos na cidade".
venres, 18 mar 2011
O tenente de alcalde, Santi Domínguez, inaugurou este venres o primeiro xardín sensorial para persoas con discapacidade visual nos xardíns históricos de Castrelos "un dos espazos máis senlleiros da cidade". Segundo destacou o nacionalista, esta iniciativa é unha mostra do compromiso de facer de Vigo "unha cidade máis igualitaria" e asegurou que este obxectivo non quedou en meras palabras, senón que se pode "comprobar en iniciativas como esta".
mércores, 16 mar 2011
O tenente de alcalde, Santi Domínguez, inaugurou hoxe a rúa Real, unha das 38 rúas e prazas que ao longo deste mandato se renovaron no Casco Vello, no que cualificou como "a maior actuación de mellora do entramado viario do barrio na súa historia". Aínda que a transformación que se deu nestes anos é "un feito", dixo que hai que seguir traballando para completar un proceso polo que garantiu que os nacionalistas van seguir apostando. O nacionalista quixo agradecer especialmente a "paciencia" e "colaboración" veciñal para poder desenvolver as obras nesta rúa e no resto do barrio.
mércores, 16 mar 2011
Un servizo de bicicletas eléctricas contribuirá no prazo dun mes e medio á mellorar a mobilidade do Casco Vello, como un paso máis na aposta pola recueperación do barrio, segundo asegurou hoxe o tenente de alcalde na súa presentación. Santi Domínguez explicou que, nunha primeira fase, o servizo operará con 8 bicicletas, cunha autonomía de 60 kilómetros, e que se poderán utilizar durante dúas horas por só un euro. Este servizo completarase co bus eléctrico, cuxa infraestrutura estase acabando de instalar nestas semanas.
martes, 15 mar 2011
O tenente de alcalde, Santi Domínguez, e a concelleira de Benestar Social, María Méndez, presentaron este martes o desdobramento das Unidades de Traballo Social municipais, que pasan de 11 a 17, e que suporá reducir as listas de agarda e unha mellora da calidade asistencial. Para Santi Domínguez esta iniciativa pon de manifesto o compromiso dos nacionalistas na atención ás persoas e a aposta por mellorar a calidade asistencial, achegando os servizos sociais á cidadanía reducindo ata 16.500 o número de persoas por traballadora social.
martes, 15 mar 2011
O tenente de alcalde, Santi Domínguez, entregou este martes os diplomas e agasallos aos gañadores e gañadoras do concurso escolar de debuxo de Vigolandia. O nacionalista expresou a súa satisfacción polo incremento de participación nesta edición do concurso, xa que presentaron os seus traballos máis de 1.600 escolares de 20 centros escolares de Vigo, que supón un 28% de participantes máis que o ano pasado.
luns, 14 mar 2011
O tenente de alcalde, Santi Domínguez, percorreu hoxe varios establecementos do Casco Vello para coñecer de primeira man as demandas e suxestións dos comerciantes. O nacionalista explicou que a principal preocupación que lle transmiten é as dificultades que atravesan pola mala situación económica e pedíronlle que continúe traballando na recuperación e dinamización do barrio porque considera que ese labor vai ser fundamental para que eles podan levan mellor a crise.
venres, 11 mar 2011
O tenente de alcalde e presidente da Axencia Municipal da Enerxía, Santi Domínguez, anunciou este venres que 16 edificios públicos do Concello e a Universidade de Vigo, entre os que se atopan museos e instalacións deportivas, participarán no proxecto europeo Life Green City para potenciar o uso eficiente da enerxía. O nacionalista destacou que esta iniciativa ten o obxectivo "moi claro" de acadar un 20% de aforro no consumo enerxético e a redución do 10% nas emisións contaminantes.
xoves, 3 mar 2011
O tenente de alcalde, Santi Domínguez, manifestou este xoves seu apoio á campaña que o Consello Municipal da Muller está levando a cabo para acadar que María Xosé Queizán ingrese na Real Academia Galega. Na marco desta iniciativa, o tenente de alcalde e a concelleira de Igualdade e Normalización Lingúística, Iolanda Veloso, mantiveron unha xuntanza co presidente da RAG, Xosé Luis Méndez Ferrín. No encontro tamén participaron diversas representantes do Consello Municipal da Muller co fin de facer entrega das 365 adhesións, tanto de persoas particulares como colectivos, á candidatura da escritora viguesa.
xoves, 3 mar 2011
O tenente de alcalde, Santi Domínguez, expresou hoxe a súa satisfacción pola posta en marcha da Orquestra Xovigo, que fará a súa estrea os vindeiros 12 e 13 de marzo no Auditorio Martín Codax do Conservatorio Superior de Música de Vigo. O nacionalista salientou que os integrantes do proxecto Xovigo participarán dende mañá e ata o 7 de marzo nun campus musical que contará cos mellores profesionais que teñen que ver coas orquestras nos diferentes ámbitos.
