xoves, 30 dec 2010
O mercado de produtos tradicionais galegos que organiza a Concellería de Patrimonio Histórico celebrará a súa quinta edición o vindeiro domingo, día 2 de xaneiro de 2011. Esta feira, que conxuga a mellor artesanía tradicional coa venda de produtos ecolóxicos, avanza cara á súa consolidación no Casco Vello ao contar xa cun público fiel os primeiros domingos de cada mes.
xoves, 23 dec 2010
O tenente de alcalde, Santi Domínguez, anunciou hoxe que as obras da nova Pinacoteca estarán rematadas a finais do mes de marzo. Será a culminación dun proxecto que, segundo dixo, "vai ser unha das infraestruturas que máis significativamente vai incidir na recuperación intensa que estamos a facer do Casco Vello".
venres, 10 dec 2010
O Paseo de Alfonso acollerá o vindeiro domingo, 12 de decembro de 11 a 14 horas, a cuarta edición do mercado de produtos tradicionais galegos na que se poderán atopar produtos relacionados coas festas de Nadal. Segundo informa a Concellería de Patrimonio Histórico, ademais da celebración da feira, haberá unha sesión de contacontos de 12 a 12.50 horas a cargo de Beatriz Campos, da compañía Migallas Teatro, que narrará unha historia que terá a unha cabaza como protagonista.
martes, 7 dec 2010
O concelleiro de Patrimonio Histórico, Eudosio Álvarez, anunciou este martes a posta en marcha da segunda fase de sinalización do patrimonio arquitectónico e cultural da cidade, que inclúe 40 edificios históricos, que se suman aos 37 da primeira fase. Segundo o edil nacionalista, esta iniciativa ten o obxectivo de "divulgar dun xeito permanente e accesible a toda a cidadanía todo este potencial histórico", que inclúe entre outros inmobles como a Casa Bárcena, o edificio Pardo Labarta, o grupo de casas para Benito Sanjurjo e o edificio Curbera.
mércores, 24 nov 2010
O tenente de alcalde, Santi Domínguez, inaugurou este mércores a reforma da Baixada á Herba, que contou cun investimento de 140.000 euros con cargo ao Plan Feil. No acto, o nacionalista destacou que na actual lexislatura o Casco Vello recibiu "o maior investimento directo por parte do Concello de Vigo que nunca se fixo", con máis de 25 millóns de euros. O tenente de alcalde indicou que este forte investimento permitiu que nestes momentos xa estean reformadas todas as rúas principais do barrio, se renovaran os servizos públicos e en construción novas dotacións culturais.
luns, 22 nov 2010
O tenente de alcalde, Santi Domínguez, presentou este luns a exposición "Quiñones de León: unha nova pinacoteca para a Galicia" que, do 26 de novembro ao 13 de febreiro, exporá na Casa das Artes unha selección de 83 obras da colección municipal da plástica galega dos séculos XIX e XX. Na presentación, o nacionalista destacou que esta mostra, que se nutre dos fondos do Museo de Castrelos, é un avance da exposicón permanente que albergará a nova Pinacoteca.
martes, 16 nov 2010
O concelleiro de Patrimonio Histórico, Eudosio Álvarez, presentou este martes a nova fase do programa municipal de axudas á rehabilitación de vivendas no Casco Vello e Bouzas, que afondan na recuperación dos barrios e na dinamización do sector. O nacionalista destacou que serán un total de 80 actuacións, 58 no Casco Vello e 22 en Bouzas, cun orzamento global de execución 3.225.000 euros dos que 1.800.000 están protexidos, pese a que segundo criticou o concelleiro nacionalista a Xunta aínda non fixo pública a súa convocatoria de axudas.
venres, 12 nov 2010
O tenente de alcalde, Santi Domínguez, expresou este venres o seu compromiso co Museo Liste no seu traballo de recuperación e posta en valor do patrimonio etnográfico de Vigo. O nacionalista asegurouno tras a sinatura do convenio co director da Fundación, Olimpio Liste, e o concelleiro de Patrimonio Histórico, Eudosio Álvarez, que ascende a 96.000 euros.
venres, 5 nov 2010
A terceira edición do mercado de produtos tradicionais galegos, que se celebrará o domingo 7 de novembro de 11 a 14 horas no Paseo de Alfonso contará coa celebración dun obradoiro de monicreques e a representación de "O galo Quirico e os seus amigos". Segundo informa a Concellería de Patrimonio Histórico, se non fose posible a celebración no seu lugar orixinal debido as inclemencias climatolóxicas, o mercado trasladarase á Praza da Constitución.
xoves, 7 out 2010
O concelleiro de Patrimonio Histórico, Eudosio Álvarez, deu conta este xoves dos datos sobre a evolución de visitas dos espazos museísticos vinculados ao Museo da Cidade, que inclúe o Pazo de Castrelos e os xacementos de Toralla e O Castro. O nacionalista destacou os "éxitos cualitativo e cuantitativo", xa que dende a posta en marcha do plan divulgativo do Museo da Cidade ,no mes de marzo, houbo máis de 60.000 visitantes.
