martes, 16 mar 2010
O tenente de alcalde, Santi Domínguez, avanzou este martes que a reconstrución do edificio que albergará o novo Centro Galego de Fotografía comezará no vindeiro mes de maio, de xeito que podería abrir no primeiro trimestre de 2011. O concelleiro anunciouno na visita que realizou ao inicio das obras de demolición do inmoble, ubicado na rúa Chao, e que segundo apuntou non será unha "demolición masiva", co obxectivo de reutilizar a pedra ben conservada na reconstrución desta nova dotación cultural.
luns, 15 mar 2010
O tenente de alcalde e concelleiro de Cascos Históricos, Santi Domínguez, presentou este luns os proxectos de rehabilitación do contorno da Praza de Diego Santos e da rúa Cruceiro Vello de Bouzas. Na súa intervención, o concelleiro salientou que estas actuacións contan cun orzamento de 489.000 euros, financiados con cargo ao Plan FEIL correspondente ao 2010, e teñen o obxectivo de recuperar espazos peonís no casco histórico de Bouzas.
venres, 12 mar 2010
O tenente de alcalde, Santi Domínguez, avanzou este venres que está previsto que a rehabilitación dos edificios que acollerán a nova pinacoteca comezará a finais de abril co obxectivo de que as novas instalacións culturais da cidade podan abrir a principios do 2011. Na presentación do proxecto, o concelleiro indicou que o será financiado con cargo fondo estatal cun orzamento aproximado de 3 millóns de euros e que a actuación "completerá a rexeneración ambiental e urbanística da parte alta do Casco Vello".
martes, 9 mar 2010
No primeiro mes de apertura ao público da musealización do poboado do Castro 4.624 persoas visitaron o xacemento. O concelleiro de Patrimonio Histórico, Eudosio Álvarez, salientou a gran acollida que o recinto arqueolóxico está a ter, sobre todo, tendo en conta que é un espazo aberto e as condicións climatolóxicas foron adversas nestas últimas semanas.
mércores, 3 mar 2010
O tenente de alcalde, Santi Domínguez, e o concelleiro de Patrimonio Histórico, Eudosio Álvarez, presentaron este mércores o primeiro proxecto do Concello de Vigo para rehabilitar a fachada marítima do Berbés, que inclúe actuacións en 48 inmobles. Os conclleiros salientaron tamén que o plan pon á disposición dos propietarios unha liña de axudas para facer fronte ás obras.
venres, 26 feb 2010
Máis de 1.500 persoas se achegaron xa á Casa das Artes para visitar a mostra "Xoias da colección Álvarez: Esplendor cerámico de Vigo", dende a súa inauguración o pasado día 18, segundo os datos facilitados pola Concellería de Patrimonio Histórico. Segundo Eudosio Álvarez, esta afluenza de público amosa o gran interese da cidadanía por coñecer o patrimonio industrial da cidade.
xoves, 18 feb 2010
O tenente de alcalde, Santi Domínguez, participou este xoves nunha visita guiada á exposición "Xoias da Colección Álvarez: Esplendor cerámico de Vigo", que se inaugura hoxe na Casa das Artes, e afirmou que a mostra é un exemplo máis da riqueza cultural e patrimonial de Vigo. No transcurso do percorrido, no que tamén participaron os concelleiros de Patrimonio Histórico, Eudosio Álvarez, Cultura, Xesus López, e Deportes, Xabier Alonso, o tenente de alcalde convidou á cidadanía a visitar a exposición, xa que é unha oportunidade única para "coñecer unha parte fundamental do noso patrimonio industrial".
mércores, 17 feb 2010
Coa vontade de que Vigo se convirta por un tempo nun campo de experimentación de ideas e actividades relacionadas co feito artístico, nace o proxecto Cidade de soños, un evento que xira en torno a tres convocatorias: una exposición de escultura denominada Natureza con arte, artistas na rúa e pegada e fume. O concelleiro de Patrimonio Histórico, Eudosio Álvarez, presentou hoxe mércores a mencionada cita que se desenvolverá entre os meses de abril e outubro, cun calendario no que resalta a participación de 1.800 persoas na elaboración por primeira vez na cidade dun gran mural de cerámica, previsto no parque de Castrelos, baixo o nome de Pegadas e fume.<br />
martes, 9 feb 2010
O tenente de alcalde, Santi Domínguez, presentou este martes a exposición "Xoias da Colección Álvarez: Esplendor cerámico de Vigo", que do 18 de febreiro ao 18 de abril se poderá visitar na Casa das Artes. A mostra intégrana 180 pezas datadas dende a década dos 40 ata o 2001, e supón, segundo subliñou, "un primeiro paso no obxectivo de recuperar o patrimonio industrial e artístico de Vigo".
luns, 8 feb 2010
Máis de 1.500 persoas visitaron este fin de semana o xacemento de O Castro, nos dous primeiros días tras a súa inauguración e apertura. O concelleiro de Patrimonio Histórico, Eudosio Álvarez, salientou a "boa acollida" por parte do público, superando as previsións de visitantes que se tiñan para os primeiros días. Os momentos de maior afluencia foron polas tardes, sobre todo, o domingo, onde foi preciso ampliar o número de persoas que realizaban as visitas guiadas.
