martes, 24 mai 2011
O mércores 25 de maio ás 20.00 h, finaliza o ciclo "Muller e saúde integral" que a concellería de Igualdade está a organizar na Casa das Mulleres desde o mes de abril co obxectivo de promover a mellora da calidade de vida e a saúde integral das mulleres potenciando o seu benestar físico e psíquico en todas as etapas das súas vidas. Nesta ocasión colabora a Fundación VIDE para a exposición do relatorio: "Muller e deporte: beneficios para a saúde".
mércores, 11 mai 2011
A concelleira de Igualdade, Iolanda Veloso, informa de que o Consello Municipal da Muller celebrado onte aprobou un comunicado de rexeitamento ao anteproxecto de Lei de Apoio á Familia e á Convivencia en Galicia, por consideralo "regresivo, patriarcal e anticonstitucional". Este organismo solicita a súa retirada e critica que a lei "supón un grave recorte dos dereitos da muller, situándoa de novo en labores de nai e coidadora".
mércores, 4 mai 2011
O xoves, 5 de maio, ás 19 h, no Centro de Documentación e Recursos Feministas contarase coa presenza de Eva Vieites Salmonte que nos falará sobre unha viguesa con historia: Urania Mella, presidenta da Unión de Mulleres Antifascistas de Vigo.
martes, 3 mai 2011
A concelleira de Igualdade, Iolanda Veloso, participou este martes na clausura do programa "Camiña con nós pola igualdade" do CEIP García Barbón. A nacionalista destacou o constante aumento de rapaces e rapaces participantes na iniciativa, que nesta nesta sexta edición chegou a 3.186 alumnos e alumnas de 42 centros escolares da cidade. A concelleira sinalou a importancia da educación "para previr a violencia e fomentar a igualdade de oportunidades entre nenas e nenos".
luns, 25 abr 2011
O Centro de Documentación e Recursos Feministas de Vigo acollerá este martes, 26 de abril, ás 19 horas, a presentación ao público da obra PARIR A LIBERDADE. O movemento feminista en Galicia, da xornalista Elvira Fente Gómez.
mércores, 13 abr 2011
O xoves 14 terá lugar unha nova conferencia do Ciclo de Charlas programado polo Centro de Documentación e Recursos Feministas de Vigo. Ás 19 h. a profesora Mª Jesús Lorenzo Modia falará sobre "Mary Wollstonecraft" escritora inglesa (1759-1797) e unha das iniciadoras do pensamento feminista.
luns, 11 abr 2011
A concelleira de Igualdade, Iolanda Veloso, asinou este luns a renovación dos convenios de colaboración coa Rede de Mulleres Veciñais contra os Malos Tratos e Dorna, entidades ás que se destinan un total de 36.000 euros. A concelleira nacionalista destacou a importancia de "manter o compromiso do Concello de Vigo coas asociacións que prestan o seu apoio ás mulleres", especialmente nun momento de crise como o actual.
venres, 8 abr 2011
A concelleira de Igualdade, Iolanda Veloso, presentou este venres a primeira edición da Escola Feminista "Centros e periferias", que terá lugar na Casa das Mulleres do 11 ao 14 de abril, de 19 a 21 horas, organizada pola ONG Implicadas no Desenvolvemento. A concelleira nacionalista destacou que o obxectivo desta iniciativa é proporcionar un espazo de coñecemento e debate no que as persoas que se moven no mundo da cooperación poidan ampliar as bases do seu traballo dende unha óptica feminista plural.
xoves, 7 abr 2011
Hoxe xoves comenza o ciclo de charlas sobre mulleres con discurso feminista programado polo Centro de Documentación e Recursos Feministas de Vigo. Ás 19 horas Encarna Otero falará sobre "Olimpe de Gouges" (Montauban, Francia, 7 de mayo de 1748 - París, 3 de noviembre de 1793) escritora,dramaturga, e política francesa, autora da Declaración dos Dereitos da Muller e da Cidadá (1791).
xoves, 31 mar 2011
A concelleira de Igualdade, Iolanda Veloso, presentou este xoves as actividades programadas pola Casa das Mulleres e o Centro de Recursos Feministas para os vindeiros dous meses, que inclúen xornadas, ciclos sobre saúde, cine, presentación de libros, exposicións e un obradoiro literario, entre outras propostas. "Con estas iniciativas preténdese chegar a toda a cidadanía, de diferentes idades e distintos intereses en dous espazos emblemáticos, e que permitan camiñar cara a unha sociedade máis xusta e igualitaria", destacou a concelleira nacionalista.
