martes, 22 dec 2009
O tenente de alcalde, Santi Domínguez, asegurou hoxe que a séptima edición de Vigolandia, que se celebra do 26 ao 30 de decembro, afonda no seu carácter social coa incorporación "por primeira vez" dun punto de recollida de xoguetes para entregar a entidades benéficas da cidade. Segundo o tenente de alcalde, trátase xa dunha das propostas "tradicionais do Nadal" de Vigo, xunto ao alumeado, a cabalgata ou o resto de actividades que organizan a Tenencia de Alcaldía e a Concellería de Cultura.
venres, 18 dec 2009
No marco da programación de Nadal organizada pola Tenencia de Alcaldía e a Concellería de Cultura, a carpa situada na Porta do Sol acollerá o vindeiro domingo 20 de decembro ás 20 horas, a actuación do prestixioso gaiteiro Patrick Molard. O recital incorporará música de gaita escocesa, irlandesa e bretona, así como de Galiza e o seu repertorio estará composto tanto por temas tradicionais como do propio autor.
venres, 18 dec 2009
A partir do venres, 18 de decembro, comezan no MARCO os obradoiros infantís de Nadal, que estarán en marcha nas vindeiras semanas. Un programa que ofrece ao público infantil e familiar a posibilidade de aproveitar o tempo de lecer neste período de vacacións escolares, desfrutando das posibilidades que ofrece a creación artística, e potenciando a función do museo como lugar de encontro social.
venres, 18 dec 2009
Baixo o título Diversión, creación e ciencia, o Museo do Mar volve a abrir as súas portas a todos os nenos e nenas de Galicia cos obradoiros de Nadal, centrados, nesta ocasión, na figura de Darwin. Dende o sábado 19 de decembro, comezarán as distintas actividades dirixidas a rapaces de entre 5 e 14 anos.
xoves, 17 dec 2009
O legado artístico de Laxeiro convertese no primeiro recollido nun Catálogo Universal que foi presentado onte nas instalacións do Centro Cultural de Caixanova en Vigo, dentro dun acto ó que asistiron representantes de diferentes ámbitos da vida galega. A publicación, editada por Galicia Nova, en galego, castelán e inglés reúne 3.581 obras de Laxeiro recollidas no papel e en formato DVD.
mércores, 16 dec 2009
A publicación, composta por tres tomos é unha combinación de goce para a vista e rigor para o estudo. Os dous primeiros tomos, compostos por máis de 300 páxinas cada un, recollen unha selección dunhas 500 obras, magníficamente reproducidas e acompañadas por unha ficha técnica básica. Ademais, inclúen diversos textos sobre a figura e a obra de Laxeiro e unhas 25 pezas comentadas por especialistas de primeira fila. O terceiro tomo inclúe a reproducción reducida de todo o corpus que forma a obra de Laxerio, unhas 3.580 referencias, e un DVD no que se clasifica cada unha das obras, cunha completa ficha técnica que inclúe imaxe, título, data, técnica, medidas, inscricións e bibliografía e diferentes posibilidades de busca.
mércores, 16 dec 2009
O tenente de alcalde destacou este mércores que o novo Centro Galego de Fotografía, que se ubicará nun inmoble da rúa Eduardo Chao recentemente adquirido polo Concello de Vigo, dará resposta a unha "demanda histórica da cidade". Nunha visita ao espazo no que se instalará esta nova dotación cultural o concelleiro afirmou que o Centro Galego de Fotografía albergará a colección do Arquivo Pacheco, así como os fondos das diferentes Fotobienais celebradas en Vigo e outra coleccións que se irán adquirindo.
martes, 15 dec 2009
The Dodos son unha banda californiana que con tres álbumes publicados é unha das propostas de Weird Folk máis interesantes. Comparten afinidades con Xiu Xiu, Iron and Wine, Animal Collective ou Six Organs of Admittance, se ben con características propias. The Dodos actuarán o xoves, 17 de decembro, no MARCO a partir das 20:30 horas. O prezo da entrada é de 12 euros.
venres, 11 dec 2009
Os sábados 12 e 19 de decembro terá lugar no museo Verbum - Casa das Palabras a actividade didáctica "Heiche contar un conto" a cargo do actor e músico Manolo Panforreteiro acompañado de dous músicos. Son dos espectáculos baseados en contacontos acompañados de música en directo e dirixidos a todos os públicos. A actividade con entrada gratuíta ata completar aforamento, terá lugar de 12 a 13 horas.
mércores, 2 dec 2009
O concelleiro de Cultura, Xesus López, anunciou este mércores que o programa "Vigo a escena" comeza unha nova etapa o vindeiro ano, xa que este circuito teatral municipal incluirá tamén as actuacións das compañías de teatro afeccionadas, ademais das profesionais. O edil nacionalista explicou que para acadar este obxectivo, e como novidade, a convocatoria para participar se fará pública o vindeiro venres e haberá 15 días naturais para cursar a solicitude.
