venres, 31 xul 2009
O tenente de alcalde, Santi Domínguez, inaugurou hoxe a remodelación da rúa Teófilo Llorente que, segundo dixo, supón o punto de partida da "reconquista real" do Casco Vello. As obras, que transformaron a rúa nun espazo peonil, contaron cun investimento dun millón de euros, o orzamento máis alto que ata o momento o Concello de Vigo ten realizado no barrio histórico.
luns, 20 xul 2009
O tenente de alcalde, Santi Domínguez, participou hoxe xunto ao fiscal superior de Galiza, Carlos Varela, e o presidente do Foro Peinador, Xosé González, no acto de descuberta dunha placa de homenaxe a Ramón Obella Vidal, investigador, empresario e galeguista que foi un dos fundadores de Zeltia. O concelleiro explicou que con esta iniciativa "estamos a cumprir unha débeda que esta cidade tiña con Ramón Obella Vidal", ao que, segundo dixo, non se lle ten dado o recoñecemento que o seu labor merece.
mércores, 8 xul 2009
O tenente de alcalde, Santi Domínguez, reclamou hoxe que o Goberno do Estado e a Xunta deixen a un lado os intereses partidistas e acaden un acordo que permita desbloquear a construción da depuradora de augas residuais de Vigo. Salientou que "hai dúas administracións responsables", que non poden seguir "mareando" sobre unha cuestión vital para o futuro da cidade e nomeadamente da súa Ría.
luns, 15 xuñ 2009
O tenente de alcalde, Santi Domínguez, salientou este luns que por segundo ano consecutivo "reforzamos as axudas e subvencións que teñen que ver con persoas e colectivos" das áreas de Cultura, Benestar Social, Deportes, Patrimonio Histórico, Xuventude, Igualde e Normalización Ligüística, e que se xestionan de forma centralizada dende Tenencia de Alcaldía.
venres, 12 xuñ 2009
O tenente de alcalde e presidente do Consorcio do Casco Vello, Santi Domínguez, deu conta hoxe das novidades que presenta o servizo de coidadores de barrio para os vindeiros mesmes. Entre elas figura a ampliación do seu horario ata as 5 da mañá ata o día 31 de agosto, e o incremento da súa plantilla, de xeito que alcalza os 14 traballadores, co obxectivo de "reforzar a presenza dos coidadores nas zonas eminentemente turísticas".
xoves, 4 xuñ 2009
O tenente de alcalde, Santi Domínguez, reuniuse hoxe co seu homólogo de Lorient, Loic Champagnat, e a directora de Relacións Internacionais do municipio francés, Christina Hogrefe, como primeiro paso para reforzar o irmanamento que existe entre ámbalas dúas cidades a través de iniciativas conxuntas. A celebración do Festival Intercéltico de Lorient, que este ano ten a Galiza como país invitado de honra, vaise a aproveitar para desenvolver iniciativas conxuntas en eídos como o turismo, a cultura, o deporte ou a educación.
mércores, 3 xuñ 2009
Nas últimas semanas estase traballando no Instituto Feiral de Vigo (IFEVI) na instalación das bancadas retráctiles, unha infraestrutura que vai permitir que o recinto aproveite mellor as súas capacidades para a organización de todo tipo de eventos. O presidente do Comité Executivo do Ifevi e tenente de alcalde, Santi Domínguez, asegurou hoxe que a colocación das novas bancadas "marchan a bo ritmo", de xeito que a actuación estará rematada cando o vindeiro mes se celebre o Campionato do Mundo de Hóckey.
venres, 29 mai 2009
O tenente de alcalde, Santi Domínguez, reclamou este venres que o goberno do Partido Popular da Xunta de Galiza "se tome en serio a Vigo" e materialice os seus compromisos coa cidade. Ademais, no trancurso dun almorzo informativo con xornalistas, o concelleiro reiterou a súa vontade de que as relacións co Goberno autonómico sexan tan fluídas como o foron co anterior executivo "no que había relación directa cos directores xerais". Sen embargo, pensa que agora vai ser máis difícil porque "se nos pon unha delegada territorial para que sirva de tapón".
xoves, 28 mai 2009
O tenente de alcalde, Santi Domínguez, salientou este xoves que as obras que integran a exposición de arte téxtil "Fiando o Vigo Vello", nas que se poden ver diversos rincóns do barrio, reflicten as melloras que se están levando a cabo no Casco Vello. Na presentación da mostra, que se inaugura mañá no Centro Comercial A Laxe, tamén participaron as creadoras e integrantes da asociación Patchwork Vigo, Mar Fernández e Auri Costas.
xoves, 14 mai 2009
O tenente de alcalde, Santi Domínguez, salientou este xoves o significado que hoxe ten o traballo a prol da lingua galega que desenvolveu Ramón Piñeiro "fronte as campañas contra o galego que existen na actualidade". Santi Domínguez así o subliñou no acto de inauguración do gabinete de Ramón Piñeiro, ubicado na Casa Galega da Cultura, no que tamén participaron Alfonso Zulueta de Haz, o comisario da restauración do espazo, Enrique Montero, o director da Fundación Penzol, Francisco Fernández del Riego, e Aníbal Piñeiro, en nome da familia.
