mércores, 13 mai 2009
Dentro do plan de rehabilitación do Casco Vello, o tenente de alcalde e presidente do Consorcio do Casco Vello de Vigo, Santi Domínguez, vén de asinar a concesión de axudas para nove proxectos de melloras en diversos inmobles deste barrio histórico por un importe total de 192.199 euros. Os edificios nos que está prevista a execución das obras están ubicados no Paseo de Alfonso XII, na Praza da Princesa, e nas rúas Santa Marta, Real, Cesteiros e Ferreiría.
martes, 12 mai 2009
O tenente de alcalde e concelleiro de Comercio, Santi Domínguez, expresou este martes o seu compromiso a presentar no mes de xuño un plan de actuación que contemple medidas concretas de axudas ao comercio, que nestes momentos é un dos sectores que máis está sentido os efectos da crise. Tras a xuntanza que mantivo con representantes de diversas asociacións de comerciantes da cidade, Domínguez salientou que a reunión serviu para chegar a un acordo sobre as principais liñas nas que traballará a Concellería de Comercio.
luns, 11 mai 2009
O tenente de alcalde, Santi Domínguez, e a concelleira de Normalización Lingüística, Iolanda Veloso, presentaron este luns a programación municipal do Día das Letras Galegas. O prato forte do 17 de maio terá lugar no parque de Castrelos, coa celebración dun Xantar-romaría e unha Festa das Letras, a lectura en diferentes puntos da cidade de textos das tres escritoras homenaxeadas ata agora nesta data e a representación de dúas obras de teatro en Zamáns e Cabral, respectivamente.
venres, 8 mai 2009
O tenente de alcalde, Santi Domínguez, salientou este venres a colaboración que dende a Tenencia de Alcaldía se está mantendo co Centro Cívico de Teis e a Asociación Veciñal para recuperar a súa memoria fotográfica. Segundo anunciou, esta colaboración materializarase na organización de diversas actividades, como a continuación da dixitalización das imaxes, a organización de exposicións, a convocatoria dun concurso e a edición de dous libros coa documentación existente.
xoves, 7 mai 2009
O tenente de alcalde, Santi Domínguez, salientou este xoves na inaguración das Xornadas de Xuventude e Tempo de Lecer "Moceando" que é preciso poñer en marcha "políticas máis axeitadas á realidade e ao que os mozos e mozas demandan". Ao longo de hoxe e mañá, arredor de 200 técnicos, profesionais relacionados coa mocidade e membros de asociación xuvenís participarán nas distintas ponencias e mesas redondas programadas.
mércores, 6 mai 2009
O tenente de alcalde e concelleiro de Cascos Históricos, Santi Domínguez, destacou este mércores que as actuacións que se están acometendo no eixo Paseo de Alfonso-Elduayen-Porta do Sol van a "bo ritmo", de xeito que serán rematadas "en prazo". Ademais, durante a visita que realizou ao Paseo de Alfonso xunto ao concelleiro de Patrimonio Histórico, Eudosio Álvarez, o tenente de alcalde subliñou que estas actuacións permitirán que este eixo sexa un gran espazo de prioridade peonil no que se dará continuidade á rúa Príncipe.
martes, 5 mai 2009
O tenente de alcalde, Santi Domínguez, destacou este martes a necesidade de "ter en conta" á Plataforma pola Defensa da Ría á hora de desenvolver actuacións no Porto de Vigo ou respecto ao tráfico marítimo de ría. O concelleiro así o manifestou tras a xuntanza que mantivo con dous representantes desta plataforma, cuxo obxectivo foi "ver a posibilidade de facer un traballo conxunto".
xoves, 30 abr 2009
O tenente de alcalde, Santi Domínguez, asegurou este xoves que coa construción do polideportivo e o campo de herba sintética, que xa están en execución, e coa segunda fase que inclúe unha zona de auga e ximnasio, o barrio de Navia contará co segundo complexo deportivo máis importante de Vigo tras o de As Travesas.
mércores, 29 abr 2009
O tenente de alcalde, Santi Domínguez, anunciou este mércores que Vigo estará presente na vindeira Universiada de Verán que se celebrará en Belgrado no mes de xullo "para promocionar o Forum FISU e o Campionato do Mundo Universitario de Taekwondo". <br />
martes, 28 abr 2009
Un total de 35 firmas automobilísticas participarán na XVIII edición do Salón do Automóbil, segundo anunciaron en rolda de prensa o tenente de alcalde, Santi Domínguez, o presidente do salón e da CEP, José Manuel Fernández Alvariño, o responsable de Márketing de Caixanova, José Luis Abelleira, e o director xeral do salón José Enrique Elvira.O certame celebrarase no Instituto Feiral de Vigo do 1 ao 10 de maio.
