martes, 10 xuñ 2008
A partir do vindeiro mércores 11 de xuño o museo municipal de Vigo "Quiñones de León" ofrece visitas guiadas ao pazo-museo, froito de colaboración entre o museo municipal e a oficina municipal de voluntariado do Concello de Vigo.
martes, 3 xuñ 2008
"Na liña dos museos de todo o mundo de programar nas súas instalacións actividades nocturnas, o museo Quiñones de León acollerá dende o venres 13 de xuño o espectáculo teatral interactivo "Noites negras en Castrelos", segundo anunciou este martes a concelleira de Patrimonio Histórico, a nacionalista Elena Maure. Fronte ás noites brancas habituais doutros museos as noites negras consistirán en cinco espectáculos nos que se realizará unha visita guiada ao pazo e os seus xardíns durante a noite, de arredor dunha hora e media de duración, un venres de cada mes, entre xuño e outubro deste ano.
luns, 2 xuñ 2008
A Casa Galega da Cultura acolle desde o luns, día 2 de xuño e ata o 29 do mesmo mes, a mostra "Terra e Mar. Cesteiros na Ría de Vigo" que organiza o CAT, Centro de Artesanía Tradicional, equipamento dependente da Concellería de Patrimonio Histórico do Concello de Vigo. A exposición plantea catro elementos cos que se xoga en cada unha das esceas: os usos para labores mariñeiras ou agrícolas dos cestos e o tipo de material, ben sexa bimbio ou madeira. A mostra realizase en colaboración coa Concellería de Cultura e Animación Sociocultural, Museo do Mar de Galicia, o Consorcio do Casco Vello, e o Instituo Camoes.
venres, 16 mai 2008
A concelleira de Patrimonio Histórico, Elena Maure, reivindicou este venres a importancia da figura de Xosé María Álvarez Blázquez para Vigo no acto de inauguración da exposición "Álvarez Blázquez. Arqueólogo de Vigo" no museo de Castrelos. A mostra, que pode visitarse dende hoxe e ata o 20 de xullo, reflicte a traxectoria de quen foi o primeiro comisario local das excavacións arqueolóxicas da cidade dende 1949 e impulsor da creación da sección de arqueoloxía do museo, da hemeroteca municipal e da conservación dos restos arqueolóxicos do municipio, e a quen este ano se lle adica o Día das Letras Galegas. <br />
venres, 4 abr 2008
O Consorcio do Casco Vello de Vigo e a Oficina Municipal de Rehabilitación Casco Vello-Bouzas convocan unha sesión informativa aos veciños, o luns 7 de abril, ás 19h30 no CITIC (Rúa de San Vicente) para explicarlles que tipos de axudas á rehabilitación están dispoñibles neste momento para propietarios privados.
martes, 1 abr 2008
O Museo Municipal "Quiñones de León" volve a editar a revista "Castrelos" na que se divulga as áreas de traballo do museo nos aspectos de arqueoloxía, arte, historia da cidade e museoloxía. A revista, primeiro número dunha segunda etapa, presentouna hoxe martes a concelleira de Patrimonio Histórico, Elena Maure e o director do museo, José Ballesta.
martes, 1 abr 2008
1.800 visitantes nun só mes avalan o éxito da exposición "Artífex. Enxeñería romana en España" no museo de Castrelos. Pola reiterada demanda o museo abrirá para visita libre a exposición tamén en horario de mañá, 10.00 a 13.30 horas, a partir do mércores 2 de abril.
venres, 25 xan 2008
O Centro de Artesanía Tradicional (CAT), presentou este venres, a través da concelleira de Patrimonio Histórico, Elena Maure, unha nova publicación dedicada á cestería tradicional. O volume, que inaugura unha colección de periodicidade anual que tratará os diferentes oficios tradicionais, recolle, segundo explicou a concelleira, "unha ampla mostra dos saberes e técnicas dun dos oficios máis antigos, que combinou ao longo de séculos vimbios, colmo e madeira para obter diferentes obxectos que resolvesen as necesidades do seu quefacer diario".
venres, 18 xan 2008
O tenente de alcalde e responsable de Cascos Históricos, Santiago Domínguez, asistiu este venres á posta en funcionamento da restaurada Fonte do Paseo de Alfonso, construida a finais do século XIX e que levaba máis de catro anos sen auga. A concelleira de Patrimonio Histórico, Elena Maure, ao pouco de asumir a súa responsabilidade, iniciou as xestións para recuperar a fonte, como unha das actuacións que o seu departamento está desenvolvendo para recuperar o noso patrimonio.
xoves, 27 dec 2007
A Concellería de Patrimonio Histórico do Concello de Vigo está a desenvolver un programa de divulgación e interpretación do patrimonio arqueolóxico, que segundo a concelleira Elena Maure, é unha "iniciativa cultural e didáctica pioneira en Galicia". Este programa inclúe actuacións dirixidas tanto aos centros educativos como ao público en xeral, dende obradoiros didácticos ata ciclos de formación para os docentes e a realización de materiais e recursos didácticos, entre outros.