O Pleno censura ao PP por rexeitar o teito de gasto que afecta a 18 millóns de euros de Vigo

luns, 25 mar 2024

A decisión da dirección estatal do Partido Popular de rexeitar a proposta de teito de gasto aprobada polo Goberno e polo Congreso dos Deputados, que “penaliza a Vigo en 17, 7 millóns de euros”, recibiu hoxe a reprobación conxunta dos concelleiros do PSdeG-PSOE e do BNG. Cos 20 votos dos edís socialistas e nacionalistas, o Pleno Municipal de hoxe aprobou a moción, presentada polo PSdeG-PSOE, que censura aos concelleiros populares por rexeitar no Senado a proposta de teito de gasto, e que lles “esixe” pedir desculpas á cidadanía viguesa polos preto de 18 millóns que ven comprometidos.

O Concello urxe á Xunta a acabar co cofinanciamento dos tres centros de día de Vigo

luns, 25 mar 2024

A Corporación municipal demanda á Xunta de Galicia que asuma a competencia exclusiva que lle corresponde en temas de Benestar Social e que derrogue a obrigación imposta ao Concello de Vigo de cofinanciar tres centros de titularidade autonómica. A moción, presentada polo grupo municipal socialista, contou cos votos dos 3 edís do BNG. Os corporativos urxen á administración galega a liberar os 350.000 euros do cofinanciamento dos centros de día de Teis, Coia e Valladares, para dedicalos a outras necesidades.

O Pleno de Vigo rexeita a censura da Deputación a catro mulleres relatoras do proxecto “Aquí faltan páxinas”

venres, 1 mar 2024

A Corporación Municipal aprobou hoxe, cos votos a favor dos concelleiros de PSOE e do BNG, a moción de rexeitamento á actitude e á decisión adoptada pola Deputación Provincial de Pontevedra, presidida polo PP, de censurar por causas políticas e ideolóxicas a catro mulleres relatoras inicialmente convidadas a participar no proxecto “Aquí faltan páxinas”. A proposta saíu adiante, na sesión extraordinaria celebrada este venres, co voto en contra dos catro edís do PP.

A Corporación urxe á Xunta a renovar as caldeiras máis antigas dos colexios públicos e instalar unhas máis eficientes

luns, 26 feb 2024

A Corporación Municipal de Vigo aprobou este luns por unanimidade a moción do grupo socialista coa que esixe á consellería de Cultura, Educación, e Universidade que realice os investimentos necesarios nos colexios públicos da cidade para substituír todas as caldeiras de maior antigüidade por unhas máis modernas e eficientes enerxeticamente coas que garantir o desenvolvemento da actividade escolar e o benestar da comunidade educativa. “É necesario un investimento xa nunhas caldeiras máis eficientes e máis sostibles que proporcionen o ambiente adecuado para o desenvolvemento das actividades educativas diarias”, reclamou a concelleira de Educación ao lembrar que 6.000 alumnos e os equipos directivos carecen de "confort térmico", pasan frío.