venres, 14 nov 2008
A veciñanza de Lavadores, Beade, As Travesas, A Miñoca, Zamáns e Candeán poderá gozar esta fin de semana coa programación de teatro do "Vigo a Escena", organizada pola Concellería de Cultura do Concello de Vigo. Hoxe 14 de novembro, a compañía The Pinga Teatro representará "Unha rosa no xardín" en Lavadores; mentres que mañá, 15 de novembro, Aforo Teatro interpretará "Do cotián: o absurdo" en Beade, Máscara Producións levará á escena "Asalto de Cama" no paraninfo do instituto Santa Irene, e Disque Danza presentará "E me deixo enlear" no auditorio do Conservatorio de Música da Miñoca; o domingo 16 de novembro, Títeres en Acción representará "Trastos vellos" en Zamáns e Aforo Teatro levará a obra "Do cotián: o absurdo" en Candeán.
mércores, 12 nov 2008
O Festival ARE MORE 08 continúa co ciclo 'Encontros Crepusculares' que o 13 de noviembre ofrece a actuación "A Imaxe da melancolía. A arte da Usurpación" ás 20:45 h. na Igrexa María Auxiliadora de Vigo, con entrada libre até completar aforamento.
mércores, 12 nov 2008
O 13 de novembro de 2008, o MARCO cumpre seis anos dende a súa apertura ao público. O sábado 15 e domingo 16 de novembro, a festa aniversario ofrece un amplo programa de actividades para visitantes de todas as idades, que se suman ás tres exposicións temporais que actualmente se mostran en salas.
martes, 11 nov 2008
O 13 de novembro de 2008, o MARCO cumpre seis anos dende a súa apertura ao público a finais do ano 2002. Durante a fin de semana do 15 e 16 de novembro, unha vez máis, a festa do 6º aniversario ofrece un amplo programa de actividades para públicos de todas as idades, que inclúe espectáculos de maxia nas salas, Maratón ArtFutura no salón de actos, DJs na cafetería, talleres para familias no Laboratorio das Artes, actividades específicas para maiores na Biblioteca, obradoiros para público infantil na tenda-librería Plaxio, menús e sorpresas no restaurante TEMPO, e visitas guiadas ás exposicións temporais, entre outros eventos.
martes, 11 nov 2008
A Fundación Caixa Galicia presentou esta mañá na Casa das Artes de Vigo a exposición Fernando Botero. Abu Ghraib – O circo, unha produción realizada coa colaboración do IVAM valenciano e o apoio do Concello de Vigo, que presenta as dúas series de pinturas máis influentes do traballo recente do artista colombiano.
venres, 7 nov 2008
O festival de música ARE MORE ofrece unha actuación do guitarrista Tomás Camacho, nunha homenaxe ao compositor Issac Albéniz. O concerto será o día 8 de novembro, na Igrexa de María Auxiliadora ás 20.45 horas. Con entrada libre até completar aforamento.
venres, 7 nov 2008
A novena edición das Xornadas de Danza e Música Tradicionais Galegas celebrarase esta fin de semana, 8 e 9 de novembro a partir das 20:00 horas no Centro Cultural Caixanova coa actuación de seis agrupacións galegas, según indicou este venres o concelleiro de Cultura e Animación Sociocultural do Concello de Vigo, Xesus López. O edil do BNG salienta que se trata dunhas xornadas gratuítas para as que se poden recoller as invitacións nas propias instalacións do Centro Cultural a partir das 18:30 horas.
xoves, 6 nov 2008
A compañía Lambríaca Producións representa a obra "Chicho e a Santa Compaña", ás 19.30 h. na AVV Emilio Crespo San Paio de Navia. Ás 20.00 horas na AVCD " Monte da Mina" de Castrelos o grupo de teatro Fulano, Mengano, Citano pora en escena "Arte" e Máscara Producións "Asalto de cama" ás 20 horas na AVV Agaraimo en San Xoán Poulo.
xoves, 6 nov 2008
Coincidindo co arranque do novo curso escolar, a Fundación Laxeiro reanudou o pasado mércores as súas actividades didácticas para escolares baixo o título Coñece a Laxeiro co obxectivo de tender canles de comunicación entre a educación, a cultura e a arte.
xoves, 6 nov 2008
Recuperar a festa do magosto como unha festa de barrio e da cultura galega na que participe toda a cidadanía é un dos obxectivos da programación "MoveVigo Magosto 2008", segundo salientou este xoves o concelleiro de Cultura, Xesus López. Na presentación do programa, na que tamén participou Xosé Couñago Ribeira, vogal de Cultura da Federación Veciñal "Eduardo Chao", o edilexplicou que 104 actividades terán lugar ata o 30 de novembro nos barrios e as parroquias de Vigo.
