Coa exposición de Loreto Martínez Troncoso, o MARCO inaugura o ciclo titulado ‘ENTRAR NA OBRA’, que se desenvolverá nas salas do primeiro andar, e cuxo nome está tomado da célebre peza de Giovanni Anselmo Entrare nell’opera (1971). A exposición, comisariada por Agar Ledo Arias e Iñaki Martínez Antelo,poderá verse do 28 de xaneiro ao 27 de marzo.
O alcalde de Vigo participou este venres na inauguración da mostra da artista viguesa no Museo de Arte Contemporánea de Vigo, onde permañecerá ata próximo 27 de marzo cunha exposición coa que o MARCO abre o ciclo "Entrar na Obra". Este programa procura a participación do espectador mediante a súa reacción ao visionado das obras.
O concelleiro de Cultura, Xesus López, presentou este luns a programación do museo Verbum para o primeiro trimestre de 2011 e anunciou que as persoas que acrediten estar empadroadas en Vigo así como os escolares de colexios da cidade que realicen visitas en grupo poderán acceder gratuitamente. O concelleiro nacionalista, ademais, fixo balance das visitas que recibiu o museo e salientou que no ano 2010 produciuse un incremento do 14,7% respecto ao 2009.
O museo Verbum-Casa das Palabras acolle do 21 de xaneiro ao 27 de febreiro a mostra "Valle-Inclán, Palabra e Imaxe". Esta exposición é unha iniciativa pioneira e a presentación mundial da obra en galego de Valle-Inclán, o poema "Cantiga de Vellas". Na inauguración está prevista a asistencia dos comisarios da exposición, José Telmo Grande Pérez e Paula Mariño Pazó (Ateneo de Bouzas)e o Director do museo, Rosendo Gonzalo Covelo Roma. A continuación da inauguración, haberá un recital a cargo de Teo Cardalda e María Monsonís que estrearán tres poemas de Valle-Inclán musicados polo compositor vigués e que forman parte do seu proxecto para o 2011: "Claves Líricas", un disco libro sobre o autor.
O Museo do Mar de Galicia afronta este ano 2011 co obxectivo de consolidarse entre a poboación galega. Para acadar este fin deseñouse un plan de actividades e exposicións que virán a incrementar e potenciar as xa existentes. Deste xeito está prevista a incorporación de novas pezas, así coma o desenvolvemento dun plan que, baixo a denominación de A peza da quincena, se proporá dar a coñecer os bens exhibidos con explicacións dos mesmos durante as fins de semana a partir do vindeiro mes de febreiro.En canto ás exposicións temporais, o Museo centrarase este ano na Costa da Morte, abordando dous proxectos que gardan relación coa zona. Ademais, colaborará co Arquivo Pacheco co fin de valorizar a obra fotográfica do mesmo que garde relación coa temática mariña, e convocará por terceiro ano a bolsa de creación fotográfica O Mar.
A nova edición do festival Sinsal comezará o vindeiro sábado 22 de xaneiro co concerto que ofrecerá a arpista e pianista Johanna Newson no teatro do Centro Cultural de Novacaixagalicia ás 21 horas. Segundo informa a Concellería de Cultura e Animación Sociocultural, as entradas oscilan entre os 18 e os 28 euros e pódense mercar a través da web www.servinova.com
Clubes de lectura, obradoiros de banda deseñada e actos para os menores centran as actividades para o mes de xaneiro que organiza a Biblioteca Pública Central de Vigo.
O programa estable de artes escénicas que organiza a Concellería de Cultura no Auditorio Municipal continúa coa actuación que ofrecerá a Orquestra Vigo 430 o vindeiro mércores, 19 de xaneiro ás 20.30 horas. O concerto terá a Alejandro Garrido como director e nesta ocasión contará con Rosa Campos ao clarinete di bassetto. De Wolfgang Amadeus Mozart, o repertorio inclúe a Obertura da Ópera "Bastien und Bastienne" e o concerto para Clarinete e orquestra en La maior, KV 622; ademais, de Franz Schubert, a orquestra interpretará a Sinfonía Nº5 en Si bemol maior, D 485.
O tenente de alcalde. Santi Domínguez, e o concelleiro de Cultura, Xesus López, quixeron comprobar hoxe os últimos preparativos da Cabalgata de Reis que percorrerá mañá, a partir das 18:30 horas, as rúas do centro da cidade. Os nacionalistas puideron ver os últimos detalles da elaboración das carrozas que levarán a Melchor, Gaspar e Baltasar, que como o resto da comitiva, terán como temática os contos infantís e os debuxos animados.
O concelleiro de Cultura, Xesus López, e o director do Arquivo Pacheco, Vítor Vaqueiro, presentaron este xoves a nova axenda deste arquivo para 2011, integrada por imaxes relacionadas co mar. O traballo desenvolvido polo equipo do Arquivo Pacheco permitiu, nestes últimos tres anos, que o número de fotografías dixitalizadas sexa de 70.000 e de 60.000 as completamente ordenadas.