venres, 25 feb 2011
Música e teatro centran as propostas que a Concellería de Cultura e Animación Sociocultural organiza no Auditorio Municipal para este fin de semana. Mañá sábado, 26 de febreiro, terá lugar o musical "Inside... The wall" ás 21 horas, en homenaxe ao clásico de Pink Floyd. O domingo, a compañía La Tirita Teatro interpretará a obra "Bajo mi cama una estrella" ás 18 horas, recomendada para nenos e nenas de 3 a 7 anos. Nos dous casos pódense adquirir na web www.laboleteria.es ou na taquilla unha hora antes do comezo da actuación.
venres, 25 feb 2011
O tenente de alcalde, Santi Domínguez, inaugurou este venres a exposición "Vigo, século XIX: o nacemento dunha cidade" no Museo da Cidade "Quiñones de León". Integrada por 110 obras orixinais e con música creada especificamente para acompañar as visitas, poderá visitarse ata o 26 de febreiro de 2012. Segundo destacou o nacionalista, esta mostra é a máis importante dos últimos anos, xa que supón "o paso definitivo para transformar o Pazo de Castrelos en sede permanente dunha exposición sobre a historia da cidade ".
xoves, 24 feb 2011
O tenente de alcalde, Santi Domínguez, asistiu este xoves na ao inicio das obras do Centro Galego de Fotografía, que albergará as coleccións fotográficas dos arquivos Pacheco, Ksado e os fondos das Fotobienais. Segundo destacou o nacionalista este novo espazo cultural de Vigo dá resposta a dous obxectivos cos que se comprometeu o BNG ao asumir tarefas de goberno, como son a recuperación do Casco Vello e a creación dunha "verdadeira rede museística que poña en valor o patrimonio cultural e histórico da cidade", á que tamén contribuirá a apertura da Pinacoteca.
xoves, 24 feb 2011
O programa "Con T de Teatro" continúa mañá, 25 de febreiro, no Auditorio Municipal coa obra "Exitus", que a compañía Titzina Teatro interpretará a partir das 21 horas. Segundo informa a Concellería de Cultura e Animación Sociocultural, o prezo das entradas é de 7 euros e pódense adquirir na web www.laboleteria.es ou na taquilla unha hora antes do comezo da actuación. A programación completa do Auditorio Municipal pódese consultar na web www.vigocultura.org.
mércores, 23 feb 2011
O concelleiro de Cultura, Xesus López, presentou este mércores a terceira edición do programa Duplo R, que terá lugar o venres, 25 de febreiro, na sala Inferno a partir das 19:30 horas, co obxectivo de unir dúas liñas como son a tradición galega das regueifas e a expresión cultural urbana do rap e o hip hop. Como novidade, Xesus López anunciou que ás 18 horas celebrarase unha sesión de grafiti e break na confluencia das rúas Urzáiz e Méndez Núñez.
mércores, 23 feb 2011
O Auditorio Municipal acolle mañá, 24 de febreiro, unha nova actuación organizada pola Concellería de Cultura e Animación Sociocultural dentro do seu programa estable de artes escénicas. Será o concerto que ofrecerá a Sociedade Filharmónica, integrada polo dúo do pianista Juan Manuel Varela e a soprano Aida López Carrera, a partir das 20.30 horas. As entradas teñen un prezo de 5 euros e pódense adquirir na web www.laboleteria.es ou na taquilla unha hora antes do comezo da actuación.
Psicanálise, Marxismo, Feminismo: a esquerda lacaniana<br />
Análise de textos de Slavoj Zizek, Ernesto Laclau e Judith Butler
martes, 22 feb 2011
Do mércores 23 de febreiro e ata o vindeiro 7 de abril ,en horario de 18 a 21 horas, terá lugar no museo Verbum – Casa das Palabras un Seminario de Filosofía Política con conferencias a cargo das figuras máis destacadas do pensamento contemporáneo. A entrada é de balde.
venres, 18 feb 2011
Para conmemorar o 75 aniversario do pasamento de Valle-Inclán, o museo Verbum oferta unha completa programación de actividades que xiran ao redor da súa figura. Así, poderase ver a exposición temporal "Valle-Inclán, Palabra e Imaxe" ata o vindeiro 27 de febreiro, e participar nos obradoiros dos domingos deste mes, "Cantiga de Vellas", o seu único poema en galego.
venres, 18 feb 2011
A Concellería de Cultura e Animación Sociocultural organiza no Auditorio Municipal dúas actuacións ben diferentes para este fin de semana. Mañá sábado, 19 de febreiro, propón gozar co concerto que ofrecerá Mark Kozelez a partir das 21 horas. As entradas teñen un prezo de 10 euros. O domingo, o mago Cali abrirá as portas da imaxinación dos máis pequenos e pequenas co espectáculo "Contos de maxia", ás 18 horas. As entradas teñen un prezo de 3 euros para os nenos e nenas ata 12 anos e 5 euros para os maiores. Nos dous casos pódense adquirir na web www.laboleteria.es ou na taquilla unha hora antes do comezo da actuación.
xoves, 17 feb 2011
O museo Verbum – Casa das Palabras inaugura hoxe a exposición temporal "O OBXECTO POÉTICO E A EDICIÓN. DÚAS ACHEGAS DENDE O SURREALISMO" que se poderá visitar ata o vindeiro 1 de maio en horario de martes a domingo de 10 a 19 horas. A mostra é unha incursión no surrealismo mediante un proxecto expositivo realizado ad hoc para o Verbum da man da Fundación Granell.
