xoves, 10 mar 2011
O tenente de alcalde, Santi Domínguez, anunciou hoxe que a Orquestra Xovigo actuará por primeira vez os vindeiros 12 e 13 de marzo, ás 20.30 horas, no Auditorio Martín Codax do Conservatorio Superior de Música de Vigo coa estrea mundial da obra "Rhapsody in blue", do compositor galego Fernando Buide. O nacionalista expresou a súa satisfacción pola posta en marcha deste proxecto, que comezou a xestarse hai case dous anos e asegurou que amosa a "aposta pola formación dos xoves músicos vigueses".
luns, 7 mar 2011
O concelleiro de Cultura, Xesus López, presentou este luns o programa do décimo Festival Alternativo de Artes Escénicas de Vigo, que se desenvolverá do 10 ao 20 de marzo en distintos espazos culturais da cidade. O concelleiro nacionalista destacou que co motivo do Día Internacional da Muller e en colaboración coa Unidade de Igualdade da Universidade de Vigo, a primeira xornada estará especialmente dedicada ás novas creadoras galegas cunha actuación no Marco ás 20 horas e outra no Auditorio Municipal ás 21.30 horas.
venres, 4 mar 2011
A exposición "Quiñones de León: unha nova pinacoteca para Galicia", que dende o pasado mes de novembro se pode visitar na Casa das Artes, pechará o vindeiro luns, 7 de marzo, por mor dos traballos de montaxe da nova Pinacoteca. Organizada polas concellerías de Patrimonio Histórico e Cultura, a mostra recibiu dende o 26 de novembro de 2010 ao 2 de marzo de 2011 un total de 3.734 visitantes, que puideron ver o avance da exposición permanente que albergará o novo centro cultural vigués.
venres, 4 mar 2011
O Auditorio Municipal acollerá o domingo, 6 de marzo, a obra para público familiar "Cinderela mix", que interpretará Artello Teatro ás 12 e ás 18 horas. A representación enmárcase dentro do programa "Vigo a escena" que organiza a Concellería de Cultura e o prezo das entradas é de 3 euros para os nenos e nenas ata 12 anos e 5 euros para os maiores. Pódense adquirir na web www.laboleteria.es ou na taquilla unha hora antes do comezo da actuación.
xoves, 3 mar 2011
O Concelleiro de Cultura, Xesus López, presentou este xoves a estrea da obra "Mundo Lois", que terá lugar mañá, 4 de marzo, no Auditorio Municipal ás 22 horas. O concelleiro nacionalista destacou a importancia que terá este acto no marco da programación estable de artes escénicas da Concellería de Cultura e a dedicación do Día das Letras Galegas ao escritor Lois Pereiro, no obxectivo de difundir a súa obra.
mércores, 2 mar 2011
O Auditorio Municipal acolle mañá, 3 de marzo ás 20.30 horas, o concerto de Najwa Nimri, no que presentará o seu último traballo discográfico "El último primate". O prezo das entradas para esta actuación, integrada na programación estable de artes escénicas da Concellería de Cultura, é de 10 euros e pódense mercar na web www.laboleteria.es ou na propia taquilla unha hora antes do comezo das actuacións.
martes, 1 mar 2011
O concelleiro de Cultura, Xesus López, presentou hoxe a sétima edición do festival Isto Ferve, que terá lugar do 4 ao 27 de marzo no Teatro Ensalle. O nacionalista salientou a importancia de organizar festivais de teatro alternativo, como este certame, no que participarán catro compañías de longa traxectoria: Provisional Danza, Magrinyana, Cambaleo Teatro e El Canto de la Cabra.
martes, 1 mar 2011
O programa estable de artes escénicas que organiza a Concellería de Cultura e Animación Sociocultural no Auditorio Municipal continúa mañá, 2 de marzo ás 20.30 horas, cunha nova actuación da Orquestra Vigo 430. O concerto terá a Alejandro Garrido como director e nesta ocasión contará con Anna Puig como viola solista. O prezo das entradas é de 5 euros e pódense adquirir na web www.laboleteria.es ou na taquilla unha hora antes do comezo da actuación.
luns, 28 feb 2011
O próximo martes 1 de marzo, ás 20.00 horas no Museo Verbum , o Festival Sinsal presenta a "primeira parada" da exposición MÚSICA EN BRANCO: MEMORIA DUNHA CIDADE. Ata o 27 de marzo, poderase visitar esta exposición e participar nunha obra colectiva, unha homenaxe á música que nos emociona.
venres, 25 feb 2011
Da man do Consello Municipal da Muller, a Concellería de Igualdade e a Concellería de Cultura, a mostra "Vermellas. Chamábanlles rojas" inaugúrase o venres 25, na Casa das Artes, co gallo da celebración do Día Internacional da Muller, e poderá ser visitada ata o vindeiro día 20 de marzo. Froito do proxecto de investigación interuniversitario "As vítimas, os nomes, as voces e os lugares" da Universidade de Santiago, a exposición pon nome e rostro ás mulleres represaliadas en Galicia tras o golpe de estado de 1936 mediante abundante documentación literaria, ademáis de fotografías e material audiovisual.