luns, 8 nov 2010
O Pleno da Corporación Municipal deu este luns -coa oposición do PP- a aprobación inicial ás contas do Concello para 2011, de 227 millóns, sendo a primeira vez na historia recente viguesa que se aproba un cuarto orzamento consecutivo. A concelleira de Economía e Facenda, Raquel Díaz, defendeu "a gran atención social e educativa" do texto aprobado, que se presenta "cun gran obxectivo: crear emprego e facer cidade", e inclúe 18 millóns en investimentos.
venres, 29 out 2010
Abel Caballero explicou hoxe venres que os orzamentos do Concello para 2011 inclúen unha amortización de débeda de 12,5 millóns e un crédito de 11, polo que as contas municipais tras o próximo exercizo verán reducido o seu nivel de endebedamento. O alcalde indicou que, ao remate de 2011, o Concello de Vigo continuará a ser, como na actualidade, o municipio español con menor débeda.
xoves, 28 out 2010
A Xunta de Goberno Local deu este xoves luz verde ás contas do Concello para o próximo ano, que totalizan 227 millóns de euros, un 8% menos que o de 2010. Abel Caballero salientou o descenso en gasto corrente e de persoal, ao tempo que se reservan 18 millóns para investimentos e sube o gasto social e educativo. O cuarto orzamento consecutivo aprobado, a primeira vez que acontece en Vigo en democracia, "pon de relieve a estabilidade deste goberno", asegurou o alcalde.
luns, 27 set 2010
O Pleno da Corporación ratificou este luns as ordenanzas fiscais para o próximo ano. Os impostos conxelaranse tras a aplicación do IPC (un 1,5%), non se actualizarán as taxas de escolas infantís e centros de maiores, e reducirase a de asistencia domiciliaria nun 1,31%. A concelleira de Facenda, Raquel Díaz, subliñou que a carga fiscal da cidadanía diminuirá o vindeiro ano, pese a ser hoxe en día o gran concello galego con menor carga fiscal.
xoves, 16 set 2010
A concelleira de Economía e Facenda, a socialista Raquel Díaz, explicou hoxe xoves que a presión fiscal en Vigo ascende a 488 euros per cápita, por debaixo de cidades como A Coruña ou Santiago e a metade de urbes como Madrid. Díaz defendeu as políticas sociais en materia económica que aplica o goberno de Abel Caballero -e da benefícianse unhas 10.000 familias-, que diminúen a carga fiscal, rebaixa a débeda municipal e multiplica os investimentos.
martes, 14 set 2010
Raquel Díaz explicou que a xestión do goberno municipal posibilitou que, con respecto ao ano 2005, a débeda do Concello pasara dun 47% ao 19% actual ao tempo que os investimentos neste mandato multiplicáronse por cinco. "A nosa acción de goberno é visible e responsable", indicou a socialista, pois sitúa a Vigo como o gran concello español en réxime común con menor nivel de débeda.
mércores, 8 set 2010
O alcalde informou que o Goberno de España atenderá "as tesis de Vigo" sobre o financiamento dos municipios e terá en conta o nivel de débeda de cada concello para o próximo ano. Vigo, a gran cidade menos endebedada de España en réxime común, poderá así renovar as súas amortizacións e sumará ao seu financiamento "alo menos" 10 millóns de euros "sen endebedamento adicional".
venres, 3 set 2010
Abel Caballero informou hoxe venres das ordenanzas fiscais aprobadas polo goberno local de cara ao orzamento de 2011, contas nas que aplicarase un ano máis o IPC anual de abril -o 1,5%-. Á conxelación en termos reais dos impostos súmase a non aplicación do IPC ás taxas das escolas infantís, dos centros de día para maiores e nos servizos de asistencia domiciliaria.
venres, 13 ago 2010
A concelleira de Economía e Facenda, Raquel Díaz, reclamou hoxe venres á Xunta de Galicia que dea luz verde "inmediatamente" ao Plan Económico Financeiro municipal presentado ao goberno autonómico en xuño. A socialista pediu "celeridade" na decisión, tal e como resolveu noutras ciudades galegas, para facer posible os investimentos do Concello na cidade, como a humanización de Manuel Álvarez.
martes, 8 xuñ 2010
O alcalde de Vigo, Abel Caballero, anunciou este martes que o Concello vai modificar o Plan Económico Financeiro para incluir a diminución das retribucións dos funcionarios e a prohibición de endebedamento para o ano 2011, derivados do Real Decreto do Goberno de España. Os técnicos municipais non estimaron necesario a modificación do Plan pero a Xunta de Galicia "ten dúbidas", indicou Caballero, polo que cambiarase e a vindeira semana estará remitido ao goberno autonómico para a súa aprobación.
