mércores, 8 set 2010
A Casa das Artes acolle mañá a inauguración da exposición "Os anos escuros" con fondos do Arquivo Pacheco. A mostra fotográfica presenta, a través dun conxunto de case oitenta fotografías, o tempo que seguiu ao golpe de estado que se produciu no verán de 1936. Esta é unha máis das iniciativas que a Concellería de Cultura está a desenvolver para poñer en valor o legado do Arquivo Pacheco e amosalo á cidadanía.
martes, 7 set 2010
A dimensión europea da Galicia espiritual. Textos e documentos sobre o Camiño de Santiago na Fundación Penzol" é o título da exposición que se inaugura mañá na Casa Galega da Cultura coa colaboración da Concellería de Cultura. No marco da celebración deste Ano Xacobeo 2010 e co obxectivo de contribuír ao fomento e coñecemento deste patrimonio común, cristalizado a través das peregrinacións a Compostela, a Fundación Penzol, dentro da súa liña de actividades que adoita programar e desenvolver anualmente, organiza esta exposición que permite amosarlle ao público interesado unha selección daqueles seus fondos bibliográficos e documentais que gardan relación ou versan encol do Camiño.
venres, 3 set 2010
O Museo Quiñones de León organiza unha nova proposta do programa "Domingos de museo", dirixido a un público infantil e familiar. Trátase do obradoiro "Landriña viaxa ao interior das paisaxes", que comezará ás 11.30 horas do domingo 5 de setembro, e no que a mascota do museo presentará un novo itinerario temático que inclúe xogos e actividades.
venres, 20 ago 2010
O programa "Domingos de Museo", que se desenvolve todos os domingos no Museo da Cidade Quiñones de León propón para o vindeiro 22 de agosto un novo obradoiro destinado aos rapaces e rapazas e ao público familiar. Trátase da actividade "Landriña viaxa ao interior das paisaxes", que comezará ás 11.30 horas e durante unha hora a mascota do museo guiará aos participantes nun itinerario polas súas paisaxes favoritas da colección do pazo.
martes, 17 ago 2010
A mostra "Vigo Pleamar. Máximal Aérea", instalada nos xardíns da Alameda dende o 15 de xullo, amplía o periodo de exposición ata 31 de agosto. Segundo informa a Concellería de Cultura, prorrógase a mostra debido ao éxito acadado dende a súa inauguración e o interese que dende entón ten espertado entre os visitantes.
venres, 13 ago 2010
O Museo da Cidade Quiñones de León organiza para o vindeito 15 de agosto unha nova proposta gratuíta do programa "Domingos de Museo", centrada nesta ocasión na mitoloxía. A actividade, dirixida aos nenos e nenas e ás familias, comezará ás 11.30 horas e terá unha hora de duración. Na visita, os familiares que acompañan aos rapaces poden participar na actividade ou deixalos ao coidado do persoal educador.
xoves, 12 ago 2010
O cantante libanés Mika porá o vindeiro sábado 14 de agosto (23:00 horas) no auditorio de Castrelos o broche de ouro ás Festas de Verán 2010. Segundo afirma o concelleiro de Cultura, Xesus López, as festas deste ano contaron cunha programación ampla e variada, adaptada a todos os públicos e idades e que foi seguida por milleiros de persoas en diferentes puntos da cidade.
venres, 6 ago 2010
O concelleiro de Cultura e Animación Sociocultural, Xesus López, anunciou hoxe que xa quedan moi poucas localidades á venda para o concerto de David Bisbal de mañá sábado (23:00 horas) no auditorio de Castrelos, "polo que lograremos un cheo histórico en Castrelos".
mércores, 4 ago 2010
O programa Vigo Folk comezará mañá, día 5 de agosto, coa actuación do gaiteiro vigués Álvaro Costas&Hot Band na Praza de Compostela (22:30 horas), segundo anunciou hoxe o concelleiro de Cultura e Animación Sociocultural, Xesus López. Na presentación do programa tamén participaron o presidente da Asociación Cultural Interfolc, Emilio Sotelino; e o director da escola Municipal de Danza, Wenceslao Cabezas del Toro, Polo.
martes, 3 ago 2010
O programa Castro Cativo, dirixido aos máis pequenos, contará este ano cun complemento importante, segundo explicou hoxe o tenente de alcalde, Santiago Domínguez, co espectáculo de Bob Esponja, que se celebrará na praia de Samil os días 4 e 5 de agosto. O teatro infantil incluído no programa Castro Cativo, que terá lugar dende hoxe ata o día 8 de agosto, trasládase ao auditorio municipal no Concello.