martes, 2 nov 2010
A Escola Municipal de Danza comezou o novo curso con case 300 alumnos e alumnas, o que supón un incremento do 11% respecto ás persoas matriculadas no curso anterior. Ademais, segundo informa a Concellería de Cultura e Animación Sociocultural, o incremento da demanda permitiu implantar un novo grupo de percusión.
venres, 29 out 2010
A Semana de Teatro Afeccionado, que de desenvolve dende o luns no Auditorio Municipal en colaboración coa Agrupación de Centros Culturais de Vigo, rematará o vindeiro domingo 31 de outubro coa entrega de premios ás catros agrupacións elixidas para participar no programa Vigo a Escena 2011. Segundo o concelleiro de Cultura, Xesus López, o obxectivo desta iniciativa é "facer partícipes aos barrios e parroquias de Vigo nas actividades culturais da cidade".
martes, 26 out 2010
O concelleiro de Cultura, Xesus López, presentou hoxe a segunda edición do programa "6x6. Punto de encontro", que se desenvolverá no Verbum os xoves dende o 28 de outubro ao 2 de decembro, ás 20.30 horas. O concelleiro nacionalista destacou que este proxecto está integrado por un total de 18 espectáculos realizados por artistas emerxentes, coa palabra como eixo central.
venres, 22 out 2010
No marco do programa estable de artes escénicas destinada ao público infantil e familiar, o Auditorio Municipal acollerá o vindeiro domingo 24 de outubro o espectáculo "Nanomaxias", a cargo da compañía Román García. Segundo informa a Concellería de Cultura a actuación será ás 18 horas e o prezo das entradas é de 3 euros para os rapaces e rapazas até 12 anos e de 5 euros para os maiores de 13 anos.
xoves, 21 out 2010
O tenente de alcalde, Santi Domínguez, e o concelleiro de Cultura, Xesus López, presentaron este xoves a nova exposición "Pedro Solveira. O que pasou e o que está por vir", que se poderá visitar na Casa das Artes dende hoxe e ata o 5 de decembro. Para Santi Domínguez, a inauguración hoxe desta mostra retrospectiva do artista vigués "é unha proba evidente do interese da Tenencia de Alcaldía e a Concellería de Cultura de poñer en valor a obra da nosa xente".
xoves, 21 out 2010
O Auditorio Municipal acolle mañá, 22 de outubro ás 21 horas, unha nova actuación do programa municipal de artes escénicas, a cargo da compañía Producións Teatrais Excéntricas que representará a obra "Un cranio furado". Ademais, segundo informa a Concellería de Cultura, quedan aprazadas dúas actuacións do programa Vigo a Escena previstas para o sábado. Trátase da representación que a agrupación Porta Aberta tiña programada na Asociación Veciñal "San Xurxo" de Saiáns e a actuación que a compañía David Fernández Rivera ía realizar na Asociación "San Mamede" de Zamáns".
martes, 19 out 2010
O concelleiro de Cultura, Xesus López, presentou hoxe a sétima edición do certame de vídeo Secuencia Cero, que se celebrará no Museo Verbum do 21 ao 23 de outubro a partir das 19 horas con entrada de balde. Salientou que no certame participarán 20 creacións distribuídos nas categorías de videocreación, documental e curtametraxe. Tamén se poderá ver a videoinstalación "Samil Plurinihista" do artista Pelucas e a actuación do actor vigués Cándido Pazó.
luns, 18 out 2010
O concelleiro de Cultura, Xesus López, presentou hoxe o novo concerto que acollerá o Auditorio Municipal dentro do programa estable das artes escénicas. Trátase da actuación da Orquestra 430, "coa que iniciamos a colaboración para convertila na orquestra residente do Concello de Vigo", o mércores 20 de outubro ás 20.30 horas. O prezo das entradas é de 5 euros, e segundo informou o concelleiro nacionalista poden adquirirse anticipadamente na web www.laboleria.es ou na propia taquilla unha hora antes do comezo da actuación.
venres, 15 out 2010
O Auditorio Municipal acollerá esta fin de semana as actuacións de O Trasno e Títeres Trompicallo, no marco da programación estable de artes escénicas, segundo informa a Concellería de Cultura. A compañía O Trasno Novo Teatro celebrará mañá, 16 de outubro ás 20.30 horas, o seu 30 aniversario, mentres que o domingo Títeres Trompicallo interpretará ás 18 horas a obra "Violeta Coletas contra as salchichas ¡gulp!", dirixida ao público infantil.
luns, 11 out 2010
O concelleiro de Cultura, Xesus López, presentou este luns a nova actuación que terá lugar no Auditorio Municipal, dentro da programación municipal e estable das artes escénicas. Trátase da estrea do espectáculo de danza "Alicia & Alicia", que se representará o mércores 13 e o xoves 14 ás 21 horas, a cargo da compañía viguesa A Producións Artísticas.