venres, 6 ago 2010
O tenente de alcalde, Santi Domínguez, cortou este venres a cinta que inaugura o apartado de competición de O Marisquiño 2010, tras comezar o onte co concerto ofrecido por Public Enemy en Castrelos. No acto, no que tamén participaron o concelleiro de Cultura, Xesus López, e o responsable de organización, Carlos Domínguez, o nacionalista asegurou que a décima edición de O Marisquiño será un "rotundo éxito" xa que as previsións apuntan que se superarán os 45.000 espectadores rexistrados no 2009.
mércores, 4 ago 2010
O tenente de alcalde, Santi Domínguez, anunciou este mércores a creación dun coro e orquestra xuvenís, que integran o proxecto Xovigo. Segundo destacou na presentación da iniciativa, na que tamén colabora a Asociación Galega de Música Atlantic Musik, o obxectivo de Xovigo é "contribuir á formación artística e académica no eido musical e artístico da mocidade viguesa" e avanzou que tras a selección de integrantes e os ensaios pertinentes, o coro e a orquestra poderán realizar a súa primeira actuación en primavera de 2011.
luns, 2 ago 2010
O actor galego Luis Tosar recibiu hoxe a praca que o nomea como "Embaixador honorífico do Casco Vello de Vigo" de mans do tenente de alcalde, Santi Domínguez. O acto tivo lugar na Casa Galega da Cultura e nel tamén participaron o concelleiro de Cultura, Xesus López, e o concelleiro de Patrimonio Histórico, Eudosio Álvarez. Trala entrega e a posterior rolda de prensa, todos eles realizaron unha visita polo Casco Vello vigués no que a primeira parada foi o bar ao que Tosar lle ten máis cariño, "O Chavolas", onde foi recibido con bicos, abrazos e case choros pola súa dona.
xoves, 29 xul 2010
O tenente de alcalde, Santi Domínguez, e o reitor Salustiano Mato acordoron hoxe establecer canles de colaboración que permitan desenvolver proxectos en beneficio da cidade no transcurso da visita institucional que o nacionalista realizou hoxe á Universidade de Vigo. Industria, comercio ou turismo serán algúns dos sectores nos que se vai traballar coordinamente para abordar proxectos en común.
venres, 23 xul 2010
O Museo da Cidade "Quiñones de León" continúa cos seus "Domingos do Museo", onde se poderá seguir gozando da visita dinamizada para nenos e nenas e familias e das visitas guiadas para público en xeral. O concelleiro de Patrimonio Histórico, Eudosio Álvarez, explicou que a mascota do museo Landriña será a encargada de presentar un itinerario temático con xogos e activiades. O percorrido iniciarase ás 11:30 horas e durará unha hora.
martes, 20 xul 2010
O tenente de alcalde, Santi Domínguez, anunciou hoxe que a partir de mañá se distribuirán gratuitamente 5.000 bandeiras galegas para que os vigueses e vigueses se sumen á celebración do Día de Galicia. "Esta iniciativa ten un obxectivo simple, que conmemoren unha data que significa que somos un país con historia, lingua e identidade propia", explicou.
xoves, 15 xul 2010
O tenente de alcalde, Santi Domínguez, salientou este xoves o acordo existente entre o BNG e os usuarios do Porto respecto a dúas cuestións fundamentais como son a necesidade de que esta institución fundamental para a cidade conte co Plan de Usos e que non se utilice como "trampolín político". O nacionalista explicouno tras a xuntanza que mantivo con este colectivo, no que tamén houbo acordo en que a importancia económica do Porto é preciso conxugala coa preservación da ría.
xoves, 15 xul 2010
O tenente de alcalde, Santi Domínguez, e a concelleira de Xuventude, Iolanda Veloso, presentaron este xoves a imaxe do complexo de actividades musicais, que se denominará Vigosónica. A nova infraestrutura musical estase a construir nas inmediacións no parque tecnolóxico de Beade-Valadares e as obras van a "gran ritmo", polo que a súa apertura se realizará no primeiro trimestre de 2011, "mantendo os prazos previstos", afirmou Iolanda Veloso.
mércores, 14 xul 2010
O tenente de alcalde, Santi Domínguez mantivo hoxe unha xuntanza con integrantes da nova directiva da Federación de Asociación de Veciños "Eduardo Chao". "Quedamos emprazados á colaboración máxima e total para axudar a acadar que os fins dos veciños e veciñas se cumpran", manifestou o nacionalista ao remate da reunión.
venres, 9 xul 2010
O tenente de alcalde, Santi Domínguez, salientou este venres que a cantante e compositora Norah Jones poderá estrear o vindeiro 14 de xullo un auditorio de Castrelos remodelado tras as melloras acometidas.
