venres, 4 mar 2011
O mercado de produtos tradicionais galegos que organiza a Concellería de Patrimonio Histórico no Paseo de Alfonso celebrará a sétima edición o vindeiro domingo, 6 de marzo. Segundo informa o concelleiro de Patrimonio Histórico, Eudosio Álvarez, nesta ocasión a feira vestirase de Entroido e contará cun ambiente de romaría con filloas, orellas, polbo e viño ecolóxico, entre outros produtos, pero tamén se poderá participar nun obradoiro de reciclaxe de xabróns de 12 a 13.30 horas.
martes, 1 mar 2011
O Museo "Quiñones de León" programa actividades didácticas da exposición "Vigo século XIX.O Nacemento dunha cidade" que comezarán o príximo 5 de marzo ata o 28 do mesmo mes. O programa didáctico da exposición está dirixido a todos os públicos e ten carácter gratuíto.
martes, 22 feb 2011
O concelleiro de Patrimonio Histórico, Eudosio Álvarez, presentou este martes o primeiro Certame de Pintura "Antonio Quesada" para novos creadores. Eudosio Álvarez afirmou que un dos obxectivos desta iniciativa, na que poden participar mozos e mozas entre 16 e 35 anos, é "animar á produción artística entre a xuventude de Galiza", ademais de recuperar o "vello certame da Praza da Princesa", que nos anos setenta foi un referente na cidade.
venres, 18 feb 2011
O tenente de alcalde, Santi Domínguez, presentou este xoves unha nova iniciativa da Tenencia de Alcaldía e a Concellería de Patrimonio Histórico para poñer en valor e dar a coñecer o "gran tesouro patrimonial vigués". Trátase da creación de 5 roteiros sinalizados nas parroquias de Candeán, Saiáns e Zamáns, nas que o nacionalista afirmou que se poden contemplar máis de 100 elementos patrimoniais, entre os que destacan as mámoas, con máis de 6.000 anos de antigüidade.
luns, 14 feb 2011
O concelleiro de Patrimonio Histórico, Eudosio Álvarez, presentou este luns o catálogo da colección de olería do Concello de Vigo, publicado polo Centro de Artesanía Tradicional. O concelleiro nacionalista destacou que é dunha "colección única en Galiza" non só polo valor artístico, senón tamén polo seu significado histórico e patrimonial, e anunciou que se exporá ao público nos vindeiros meses.
mércores, 9 feb 2011
O tenente de alcalde, Santi Domínguez e o concelleiro de Patrimonio Histórico visitaron este mércores o miradoiro do Paseo de Alfonso, no que se están acometendo traballos de acondicionamento, como o peche dos baixos e limpeza do contorno. Segundo o nacionalista, con estas actuacións no único miradoiro urbano de Vigo estase dando resposta á unha das demandas dos veciños e veciñas do Casco Vello para solucionar os seus problemas.
luns, 7 feb 2011
A moción da oposición foi apoiada polos grupos políticos que conforman o goberno vigués, aprobando por unanimidade unha moción que demanda ao Concello que continúen os traballos de investigación arqueolóxica e que sexa o propio municipio o que procure os recursos económicos suficientes que o permitan. O texto salienta que os restos "poderán proporcionar importante información histórica sobre as orixes da cidade".
venres, 4 feb 2011
Este domingo día 6, no Paseo de Alfonso, o CAT, Centro de Artesanía Tradicional da Concellería de Patrimonio Histórico continua coa su aposta por promocionar a artesanía tradicional e o produto ecolóxico cunha nova edición de FEIRA, dinamizando ao mesmo tempo espazos públicos no Casco Vello coa programación de actividades paralelas.
xoves, 30 dec 2010
O mercado de produtos tradicionais galegos que organiza a Concellería de Patrimonio Histórico celebrará a súa quinta edición o vindeiro domingo, día 2 de xaneiro de 2011. Esta feira, que conxuga a mellor artesanía tradicional coa venda de produtos ecolóxicos, avanza cara á súa consolidación no Casco Vello ao contar xa cun público fiel os primeiros domingos de cada mes.
xoves, 23 dec 2010
O tenente de alcalde, Santi Domínguez, anunciou hoxe que as obras da nova Pinacoteca estarán rematadas a finais do mes de marzo. Será a culminación dun proxecto que, segundo dixo, "vai ser unha das infraestruturas que máis significativamente vai incidir na recuperación intensa que estamos a facer do Casco Vello".