venres, 29 abr 2011
O concelleiro de Patrimonio Histórico, Eudosio Álvarez, anunciou a posta en marcha dun novo programa para coñecer a historia e o patrimonio de Vigo. Trátase da proposta "Vigo: a descoberta da historia", que integra catro rutas que se celebrarán en sábados alternativos. O nacionalista informou de que a primeira delas, "Da cultura castrexa ao século XIX, os orixes do Vigo moderno" partirá mañá, 30 de abril, ás 11 horas dende o poboado castrexo de O Castro.
luns, 25 abr 2011
O Pleno da Corporación municipal aprobou hoxe luns por unanimidade o regulamento e a ordenanza do servizo de préstamo das bicicletas eléctricas da cidade, que inicialmente funcionarán no Casco Vello. Na súa intervención o concelleiro de Patrimonio Histórico, Eudosio Álvarez, anunciou que este servizo será o complemento do bus eléctrico que empezará a funcionar a semana que vén e será "o primeiro para o transporte público de Galiza". Segundo dixo o concelleiro nacionalista, a aposta pola mobilidade e pola utilizacións de transportes alternativos é un paso máis na aposta do tenente de alcalde, Santi Domínguez, pola recuperación do Casco Vello.
xoves, 14 abr 2011
Enmarcada na conmemoración da declaración da II República hai hoxe 80 anos, o Museo da Cidade "Quiñones de León" organiza mañá, 15 de abril ás 20 horas na Casa Galega da Cultura, a conferencia "A arte galega na República", a cargo do crítico Carlos L. Bernárdez. Segundo informa a Concellería de Patrimonio Histórico, para a arte galega o período republicano supuxo unha época dourada, especialmente co pulo de artistas como Laxeiro, Colmeiro, Maside e Souto, entre outros, cuxas mellores obras poden contemplarse na propia Pinacoteca, recentemente inaugurada na rúa Abeleira Menéndez.
venres, 8 abr 2011
O éxito acadado pola proposta "Vigo: a ruta da historia", que congregou a máis de 200 persoas o pasado domingo para coñecer lugares emblemáticos da cidade, propiciou a convocatoria de novos percorridos para os vindeiros meses. Segundo anunciou o concelleiro de Patrimonio Histórico, Eudosio Álvarez, a primeira destas visitas guiadas terá lugar mañá, 9 de abril, e sairá dende o poboado do Castro ás 11 horas.
venres, 1 abr 2011
A oitava edición do mercado de produtos tradicionais galegos que organiza a Concellería de Patrimonio Histórico no Paseo de Alfonso iniciará unha nova etapa o vindeiro domingo, 3 de abril, coa ampliación do espazo utilizado e a celebración de dúas charlas de produtores ecolóxicos e un obradoiro de cestería para familias. O concelleiro de Patrimonio Histórico, Eudosio Álvarez, destacou ademais que a visita á feira formará parte do programa "Camiña e coñece", que o domingo fará un percorrido pola "Ruta da historia" da cidade.
mércores, 30 mar 2011
Os concelleiros de Cultura, Xesus López; Deportes, Xabier Alonso, e Patrimonio Histórico, Eudosio Álvarez, presentaron este mércores unha nova edición do programa "Camiña e Coñece", que o vindeiro domingo 3 de abril percorrerá diversos puntos do centro da cidade que configuran "Vigo, a ruta da historia". Os concelleiros nacionalistas destacaron que o obxectivo desta iniciativa é poñer en valor o patrimonio cultural da cidade percorrendo a pé os seus barrios e parroquias e avanzaron que a nova ruta sairá do poboado castrexo de O Castro ás 10 horas.
venres, 25 mar 2011
O tenente de alcalde, Santi Domínguez, fixo hoxe unha visita previa á inauguración da Pinacoteca do Museo da Cidade "Quiñones de León", cunha exposición de 166 obras de 83 autores, baixo o título "O fermoso rostro do país". Segundo destacou o nacionalista, coa apertura deste novo centro cultural ubicado no restaurado Pazo de Arias Taboada, o Casco Vello recibe o maior investimento municipal da súa historia, cun total de máis de 27 millóns de euros, dos que 4,6 millóns de euros destináronse á posta en marcha da Pinacoteca.
PATRIMONIO HISTÓRICO
xoves, 24 mar 2011
O venres 25 de marzo ás 20 horas ábrese ó público a nova Pinacoteca Municipal , situada na rúa Abeleira Menéndez nº 8. Con tal motivo organizaranse visitas guiadas en grupos de 20 persoas ata ás 22 horas.
luns, 14 mar 2011
O concelleiro de Patrimonio Histórico, Eudosio Álvarez, presentou este luns o Plan Didáctico para o xacemento de O Castro, que dende a súa apertura hai pouco máis dun ano recibiu máis de 30.000 visitas. O nacionalista salientou que esta iniciativa, que dende mañá estará dispoñible na web municipal, supón unha nova etapa de continuidade do proxecto museístico para que tanto os escolares como o público en xeral "teñan a posibilidade de gozar do material".
xoves, 10 mar 2011
O concelleiro de Patrimonio Histórico, Eudosio Álvarez, presentou este xoves o programa de actividades didácticas complementarias á exposición "Vigo, século XIX: o nacemento dunha cidade", recentemente inaugurada no Museo da Cidade "Quiñones de León". O concelleiro nacionalista salientou que as visitas guiadas ao cemiterio de Pereiró que integran a proposta, dunha hora de duración e gratuítas, son un "elemento ilustrador da historia da cidade", xa que nel se atopan monumentos adicados ás figuras sobranceiras de Vigo desa época.