venres, 5 xuñ 2009
Imaxina na Rúa comeza este sábado 6 de xuño para ir quentando motores de cara o Festival de Jazz de Vigo "Imaxina Sons" coa actuación da Orquestra A Tempo de Pontevedra. O obxectivo de Imaxina na Rúa é levar a música ao espazo público da man de formacións integradas na maioría dos casos por novos artistas. "A Tempo", dirixida por Miguel Angel Rodríguez, e integrada tamén por afeccionados con idades entre os 13 e 55 anos, actuará en diferentes recantos da cidade o 6 de xuño tocando standards de jazz e blues.
As actividades de Imaxina na Rúa comezan o sábado 6 de xuño coa Orquestra "A Tempo" nas rúas e prazas da cidade
xoves, 4 xuñ 2009
O programa inclúe un ciclo de mesas redondas e dúas clases maxistrais de Fred Frith e Nils Wogram<br />
A tres semanas do comezo do 5º Festival de Jazz de Vigo Imaxina Sons, ao programa de concertos do festival engádenselle as actividades de Imaxina na Rúa, Jazz na Noite, pasacalles o ciclo de mesas redondas e dúas clases maxistrais polo guitarrista Fred Frith e o trombonista Nils Wogram. Redondéase dese xeito a programación do festival, promovido pola concellería de Cultura e Animación Sociocultural do Concello de Vigo, que se desenvolverá do 25 de xuño ao 5 de xullo, pero que empeza a quentar motores o sábado 6 de xuño cos músicos da orquestra "A Tempo" de Pontevedra que tocarán por varias rúas e prazas da cidade ao longo do día. O mapa de Imaxina Sons esténdese xa a toda cidade.
martes, 2 xuñ 2009
O concelleiro de Cultura, Xesus Lopez, e Roberto Relova, director artístico de Vigo Cultura, presentaron hoxe a novena edición do programa do ciclo de novos intérpretes Xeración 2000+9 que terá lugar do 9 ao 14 de xuño no Verbum-Casa das Palabras, con entrada libre até completar<br />
aforamento.
venres, 29 mai 2009
A partir do 1 de xuño xa se poden mercar as entradas individuais para os concertos do 5º Festival de Jazz de Vigo "Imaxina Sons", organizado pola concellería de Cultura e Animación Socio-cultural do concello de Vigo, a través do servizo de venda de entradas de Caixanova, na web www.caixanova.es ou no teléfono 902 504 500. O programa do festival, que arranca o 25 de xuño ás 22h coa actuación de Charles Lloyd e que se clausura o 5 de xullo coa Vienna Art Orchestra, contempla entrada de pago nos concertos que teñen lugar no Teatro Salesianos, no MARCO e no Centro Cultural Caixanova.
venres, 29 mai 2009
A Biblioteca Municipal Central, a Biblioteca Central da Universidade e a Biblioteca Central de Caixanova ampliarán os seus horarios de cara aos exames de xuño co obxectivo de "dar resposta ás necesidades e demandas dos estudantes", segundo salientou este venres o concelleiro de Cultura, Xesus López.
xoves, 28 mai 2009
A programación do "Vigo a escena" que organiza a Concellería de Cultura para o primeiro semestre do 2009 levará o teatro esta fin de semana ás parroquias de Coia, Castrelos e Matamá. A actuación prevista para mañá venres no Centro Cívico de Teis trasládase ao día 3 de xuño neste mesmo espazo, mentres que o sábado, 30 de maio, as actuacións serán protagonizadas polas compañías Títeres en Acción en Coia e Aforo Teatro en Castrelos, e o domingo 31 de maio actuará Aforo Teatro en Matamá.
mércores, 27 mai 2009
O Verbum organiza o xoves, día 28 ás 20 horas, un concerto homenaxe ao cantautor José Afonso a cargo do grupo Couple Coffee (Luanda Cozetti, voz e percusión e Norton Daiello, baixo eléctrico),<br />
para rematar coas actividades complementarias á exposición de José Afonso no Verbum. A entradaé gratuíta ata completar aforamento.
luns, 25 mai 2009
O vindeiro domingo, 31 de maio será clausurada a exposición Laxeiro, ilustracións, estampas e deseños. Unha mostra na que por primeira vez se fai unha revisión da relación de Laxeiro co mundo editorial e da obra gráfica.
xoves, 21 mai 2009
O Marco presenta no salón de actos, a partir do xoves e ata o sábado, o ‘Epílogo sobre a sensibilidade obreira’, consistente na proxección do vídeo dunha charla de José Luis Velasco, dirixente da CNT, baixo o título ‘Para os traballadores sempre hai crise’.
martes, 19 mai 2009
A Facultade de Económicas da Universidade de Vigo e o Museo Verbum-Casa das Palabras acollerán o vindeiro 5 de xuño o dobre programa organizado para celebrar o 15 aniversario do proxecto Ponte nas Ondas, no que participarán máis de 60 centros educativos galegos, portugueses e doutros países como Arxentina, Brasil, Colombia e Cuba.