mércores, 12 mai 2010
Abel Caballero anunciou hoxe mércores a adxudicación das humanizacións de López Mora, Pizarro, Pi y Margall, Dr Cadaval, Lugo e Perú, xunto con outras melloras, cun investimento de 10 millóns de euros. Estas obras darán traballo directo a 100 persoas e, cos indirectos, a unhas 350, apuntou o rexedor. O goberno tamén validou dúas escolas infantís e melloras na Alameda de Bembrive, en Santa Cristina, nos xardíns do Castro e no carril bici da Avenida de Castelao. Os traballos iniciaranse na primeira quincena de xuño.
mércores, 12 mai 2010
O alcalde de Vigo -e presidente do Eixo Atlántico- e o presidente de Caixanova ratificaron hoxe mércores un convenio co obxectivo de apoiar aos 34 municipios do Eixo na formación de diretivos -a través da Escola de Negocios- e establecer e potenciar as relacións económicas, sociais e comercias entre Galicia e o norte de Portugal. O alcalde agradeceu á entidade o seu respaldo "determinante" para o desenvolvemento do territorio.
martes, 11 mai 2010
Abel Caballero avanzou hoxe martes que o goberno local adxudicou a humanización da rúa Celso Emilio Ferreiro e a construción dunha rotonda nesta rúa con Venezuela, para gañar en seguridade viaria. O alcalde desvelou que esta infraestrutura conmemorará o segundo centenario da cidade, e reunirase con artistas para definir o seu contido. Caballero asegurou que para o verán coñeceránse novas accións para festexar os 200 anos como cidade.
luns, 10 mai 2010
Abel Caballero entrevistouse con Manuel Chaves e con José Blanco esta mañá en Madrid. No encontro pasaron revisión ao estado dos proxectos estatais na cidade, a rede ferroviaria e aeroportuaria, a biblioteca e o Plan E. Caballero, Chaves e Blanco coincidiron en diagnosticar o magnífico estado da cidade e a boa saúde dos seus proxectos estratéxicos de futuro
venres, 7 mai 2010
O alcalde asistirá ao acto, que terá lugar o vindeiro sábado, 8 de maio, ás 19:30 horas no que ofrecerase o galardón aos afiliados da SCDR Helios de Bembrive e aos colectivos veciñais que apoiaron a proposta. No evento serán homenaxeados os presidentes anteriores da Sociedade e actuarán os grupos Coral Polifónica Helios e a banda de gaitas Cans de Palleiro.
xoves, 6 mai 2010
Abel Caballero acudíu este xoves á Colexiata de Vigo para presenciar a retirada dos vestixios franquistas do templo, o último dos doce nos que actuou o Concello, en aplicación da Lei da Memoria Histórica, "pechando feridas e desde a normalidade", apuntou o alcalde, e con todas as "facilidades" por parte do anterior e do actual bispo, aos que agradeceu a súa actitude.
xoves, 6 mai 2010
O alcalde e un centenar de alumnos e alumnas de 4º da ESO e de 1º de Bachillerato do Instituto de Educación Secundaria Castelao mantiveron na mañá desde xoves unha charla na que intercambiaron opinións sobre a marcha da cidade, as infraestruturas en marcha, o goberno municipal e a economía viguesa. No turno de preguntas debatíuse sobre o botellón, a crise e a educación, entre outros temas.
mércores, 5 mai 2010
O alcalde vigués participou onte martes no Parlamento Europeo de Bruselas nunha reunión de autoridades locais para facer unha "fronte común" polo clima. Caballero recordou que as cidades emiten máis da metade do CO2 do continente, e en Vigo "estamos na dirección contraria" porque a cidade olívica "leva tempo traballando" na materia. O socialista apuntou algunhas actuacións ao respecto, como as humanizacións e o proxecto de "cidade piloto" do coche eléctrico.
mércores, 5 mai 2010
Abel Caballero reunirase o venres en Madrid coa Secretaria Xeral do Ministerio de Industria, Teresa Santero, para tratar de definir as axudas do Goberno de España a PSA Peugeot Citroën para a fabricación do vehículo eléctrico na súa factoría de Balaídos. Para o alcalde, sería o "paso definitivo" para facer de Vigo "cidade piloto" do coche eléctrico, e anunciou que entón o Concello comprará unha flota dos novos automóbiles.