luns, 5 xuñ 2017
O Concello decretou tres días de loito oficial nos que as bandeiras ondearán a media hasta en sinal de dor e repulsa polos atentados acontecidos o pasado sábado na capital británica. "En recordo das vítimas, en atención ás súas familias e no desexo de recuperación de todos os feridos", apuntou o alcalde tras o minuto de silencio gardado na Praza do Rei por todo o Goberno. Expresou tamén a "vontade de que a batalla contra o terrorismo internacional e contra os asasinos que traen tanta dor continuará na democracia, que gañará esta batalla como tantas outras que gañou". <br />
venres, 2 xuñ 2017
O alcalde participou este venres na clausura do congreso local da formación sindical, celebrada no Auditorio Municipal da cidade, e trasladoulle a súa felicitación ao novo secretario xeral, Ernesto Fontanes, así como aos novos membros da dirección a quen animou a afrontar os importantes retos que se presentan de cara ao futuro. <br />
xoves, 1 xuñ 2017
Caballero citou este xoves artigos das Directrices Prácticas para a Aplicación da Convención do Patrimonio Mundial da UNESCO que incumpriría a proposta da Xunta para as Illas Atlánticas ao carecer de respaldo social: "a Xunta fixo a proposta de inscrición sen ningún consenso e, polo tanto, esa candidatura está invalidada".
mércores, 31 mai 2017
O alcalde participou esta mañá na apertura do I Foro Galego de Arbritraxe organizado pola Cámara de Comercio de Pontevedra, Vigo e Vilagarcía de Arousa. Na súa intervención, destacou a importancia da promoción dos procedementos arbitrais nunha cidade como Vigo "con gran capacidade para emprender e facer empresa".
mércores, 31 mai 2017
O alcalde avanzou esta mañá que o anuncio das mobilizacións sociais en favor da alta velocidade en Vigo conseguiu que desde Fomento solicitaran, logo de dous anos e medio, informes sobre a Declaración de Impacto Ambiental. Na súa opinión, o Goberno Central, coa connivencia da Xunta, non ten vontade algunha de avanzar na variante de Cerdedo, tal e como evidencia unha carta do responsable de Fomento, Íñigo de la Serna.
luns, 29 mai 2017
O alcalde avanzou este luns que a finais de xuño elevará o proxecto "Illas Cíes Patrimonio Medioambiental da Humanidade" ao goberno autonómico para a súa tramitación ante o Ministerio de Cultura. Abel Caballero volveu requerir á Xunta que se sume á proposta viguesa, que xera "unanimidade total neste territorio".
xoves, 25 mai 2017
No inauguración da I Xornada Galega de Enfermería de Saúde Mental, organizada por AEESME no Edificio Municipal do Arenal, Abel Caballero felicitou aos profesionais deste ámbito sanitario polo seu labor diario e amosoulles o seu afecto e respecto polo traballo que desenvolven cunhas doenzas que "ata hai moi pouco tempo se ocultaban". O alcalde destacou a importancia de facelas visibles para avanzar na súa abordaxe e tratamento. Ademais, deu a benvida a Vigo a todas as persoas asistentes e convidounos a gozar da estadía nunha cidade "hospitalaria e extraordinaria".
martes, 23 mai 2017
O alcalde de Vigo e o presidente da CEP, Jorge Cebreiros, coincidiron esta mañá en defender a importancia de que Vigo teña conexión directa con Madrid por alta velocidade. En declaracións aos medios, Caballero reiterou que o Concello iniciará as mobilizacións cidadás para reclamar esta infraestrutura cun concerto da Coral Casablanca na Porta do Sol.
martes, 23 mai 2017
O Concello convocou este martes un minuto de silencio ante a casa consistorial en manifestación de dó polo atentado perpetrado en Manchester na noite de onte. Vigo sumouse así á invitación da FEMP ás cidades para amosar a súa repulsa á violencia de calquera clase.
luns, 22 mai 2017
O alcalde louvou esta mañá as figuras de Antía Cal e Valentín Paz Andrade nun acto no que se descubriron dúas placas cos seus nomes en sendas aulas da Escola Universitaria de Estudos Empresariais.
