Abel Caballero informou este martes de que o Concello de Vigo xa ten todo listo para abrir esta mesma noite o pavillón do Berbés con outras 38 prazas de aloxamento destinadas a persoas sen teito. O alcalde engadiu que se é necesario está todo preparado para habilitar outro pavillón da cidade.
O alcalde deu conta esta mañá de que a Policía Local impuxo onte luns 35 novas denuncias por non cumprir o decreto de alarma, o que eleva as sancións a 249 desde o pasado 14 de marzo. Logo de afear a conduta ás poucas persoas que non cumpren o confinamento, avanzou que as sancións pretenden defender a saúde de toda a cidadanía.
Para garantir a distancia mínima entre viaxeiros, un autobús tipo “eiruga” cun segundo vehículo detrás cubrirán as liñas aos centros hospitalarios, segundo anunciou este martes Abel Caballero. Ademais, os accesos e saídas aos autobuses serán pola porta traseira, limítase o aforo ao 30% da capacidade máxima e, en próximos días, prohibirase o pago en metálico.
O alcalde lembra a importancia de deixar as bolsas cos residuos no interior dos colectores para evitar riscos, especialmente nestes momentos, e recorda que o Concello extrema a diario a atención á limpeza e desinfección das rúas.
Abel Caballero informou este luns de que o Concello de Vigo aprazou o pago de todos os impostos municipais. “É un momento no que a economía está débil e tampouco é posible facer os pagos de forma presencial”, asegurou o alcalde.
O alcalde garantiu esta mañá axudas de alimentación para todas aquelas persoas que non estean en condicións económicas de afrontar ese gasto e instou a comunicar esta situación ao Concello a través do 010. De feito, hoxe mesmo, o goberno local repartirá comida a domicilio a 150 familias vulnerables e persoas maiores.
Abel Caballero avanzou este venres que o Concello xa conta con máis de 600 vigueses rexistrados no servizo de voluntariado posto en marcha para atender a persoas vulnerables. Actualmente, desde a Oficina de Voluntariado xa están contactando cos primeiros inscritos para iniciar un curso de formación.
O alcalde deu conta esta mañá de que xa se están realizando pagos de emerxencia a familias en risco de exclusión social que teñen nenos que nestes momentos non están acudindo ao colexio e, polo tanto, non comen no comedor escolar. En concreto, o Concello abonará 50 euros por cada estudante a 1.033 familias.
O goberno local non vai tramitar ningunha das 353 multas da XER que se impuxeron desde a entrada en vigor do estado de alarma. Hoxe xa está en vigor a suspensión da Xestión do Estacionamento Regulado.
Abel Caballero anunciou este mércores que máis de 400 vigueses xa están rexistrados no servizo de voluntariado posto en marcha para atender a persoas vulnerables. Nos vindeiros días, desde a Oficina de Voluntariado contactarán con todos eles para repartir traballos, que poden ir desde acompañamentos á compra ou o médico a chamadas de teleasistencia.