O concelleiro socialista saudou o a baixada das cifras na nosa cidade e explicou que os datos reflicten que de maio a xuño o descenso foi de 849 desempregados, cunha baixada en todos os sectores excepto en agricultura e gandería. Héctor lembrou as inversións do goberno central e do propio Concello fronte a falla de criterios de reparto de fondos que leva a cabo a Xunta de Galicia.
Isaura Abelairas destacou hoxe xoves o esforzo municipal por dotar ao municipio dunha boa rede de saneamento que sexa quen de descargar á depuradora do Lagares e de evitar as inundacións nos meses de choivas. Dos 961 quilómetros de rede de sumidoiros que ten a cidade o concello leva 200 quilómetros revisados e outros 100 contan con tuberías novas ou reparadas.
O tenente de alcalde, Santi Domínguez, e o concelleiro de Patrimonio Histórico, Eudosio Álvarez, presentaron este venres o proxecto das áreas etnoarqueolóxicas para as parroquias de Candeán, Saiáns e Zamáns, que se desenvolverá con cargo ao Plan Feil cun orzamento de máis de 130.00 euros. Segundo destacou o tenente de alcalde, o obxectivo principal da actuación consiste en conservar e poñer en valor o contorno paisaxístico e arqueolóxico destes tres ámbitos para vertebralos co resto de atractivos turísticos de Vigo.
Abel Caballero recibirá mañán venres, 9 de xullo, no Ateneo de Madrid o premio Ciudadanos 2010 polo proxecto Aulas Internacionais levado a cabo pola concellería de Educación. O programa da concellería que dirixe a socialista Laura López Atrio becou a 250 alunos e alunas viguesas para estudiar inglés durante tres semanas no Reino Unido e en Irlanda.
O concelleiro de Patrimonio Histórico, Eudosio Álvarez, confirmou hoxe a aparición de restos dun enterramento nun sondeo preventivo realizado diante do adro da concatredral, previo ao inicio das obras de reforma das rúas do contorno. Os restos foron xa tapados, seguindo os procedementos técnicos esixidos, para garantir a súa protección.
O tenente de alcalde, Santi Domínguez, e a concelleira de Benestar Social, María Méndez, visitaron este xoves o centro de día que xestiona a Asociación de Familiares de Enfermos de Alzheimer (Afaga), na que tamén participou o presidente da asociación Juan Carlos Rodríguez. Durante a visita os nacionalistas presentaron un autobús adaptado, con cuxo financiamento colaborou a Tenencia de Alcaldía. Santi Domínguez afirmou que Afaga é o modelo polo que as administracións teñen que apostar, baseado na especialización, e "claro exemplo de que o PP se equivoca cando quere privatizar os servizos sociais".
O parque de Castrelos quedou onte pequeno para os case que 4.000 siareiros da selección española que decidiron seguir o partido contra Alemaña desde a pantalla xigante instalada polo Concello. A vindeira cita será o domingo, 11 de xullo, para ver o choque entre España e Holanda. Na imaxe miles de seguidores pendentes da selección española.
Rosendo será o cabeza de cartel do "KARRASKAL ROCK X", que se celebrará o sábado 10 de xullo no campo de fútbol San Cosme, en Zamáns (15 euros). Xunto ao veterano cantante madrileño estarán os grupos Sinkope, Baldosa Amarilla e Zenzar. Hoxe tivo lugar o acto de presentación deste xa veterano festival, no que participaron o concelleiro de Cultura e Animación Sociocultural, Xesús López, e os representantes da organización Santiago Serodio e José Yugueros.
O programa "Concertos no Pazo" celebrará mañá o segundo concerto nos xardíns históricos de Castrelos, a partir das nove da noite. Será unha gala lírica, ofrecida por Elisabet Filgueira Gesteira (soprano), Aaron Bernárdez Pérez (tenor), María Concepción Rodríguez Fariña (soprano) e Juan Manuel Varela Louro (piano). O programa contén, na súa maioría, obras de compositores nados no século XIX, que foron en gran parte recoñecidos polas súas obras vocais.
A Fundación Vigo en Deporte entregou hoxe as axudas do Programa Siareiros, tanto de Elite como de Base, para un total de 35 clubs da cidade, once deles de máxima categoría. Nun acto cos clubs nas instalacións de Begano, un dos patrocinadores privados de VIDE, a fundación que preside o concelleiro de Deportes, Xabier Alonso, desembolsou 112.000 euros polo número de carnés Siareiros Elite e Base que fixeron os equipos e polos adestramentos anuais das entidades deportivas de base.