O Punto Xove de López de Neira, que depende da Concellería de Xuventude, acolle a partir do luns unha exposición fotográfica sobre a paisaxe e a sociedade galega, do autor Diego Rodríguez. A mostra poderá visitarse nestas instalacións ata o 21 de setembro en horario de luns a venres de 9:30 a 14 horas e de luns a xoves de 17 a 20 horas.
A concelleira de Igualdade, Iolanda Veloso, anunciou este xoves que o prazo para participar no concurso de cartaces para empregar na campaña do Día Internacional contra a Violencia de Xénero do 25 de novembro será do 8 ao 28 de setembro. A concelleira do BNG salientou que esta convocatoriada, organizada en colaboración co Consello Municipal da Muller, ten por obxectivo "a participación de toda a sociedade e a concienciación sobre a violencia de xénero".
O tenente de alcalde, Santi Domínguez, e a concelleira de Xuventude, Iolanda Veloso, recibiron hoxe aos 30 mozos e mozas e 5 monitores que participan no programa de intercambio Vigo´ing together, un proxecto de educación non formal e tempo libre baseado na cultura mariñeira á que están ligados os países dos grupos participantes que, xunto con España, son Italia, Dinamarca, Esolovaquia e Chipre.
A concelleira de Xuventude, Iolanda Veloso, anunciou este xoves que Vigo acollerá o primeiro Festival Internacional de Curtametraxes "Curtopía" do 12 ao 26 de novembro. O prazo de inscrición e envío de películas estará aberto ata o 15 de setembro. Na presentación do certame, no que tamén participou o representante da asociación Abertal Alfonso Vázquez, a edil do BNG destacou que esta iniciativa quere dar a oportunidade aos rapaces e rapazas para que desenvolvan a súa creatividade no eido audiovisual.
O Punto Xove da Concellería de Xuventude acolleu o pasado mércores a entrega do premio ao gañador do concurso de fotografía de móbil "Inter Rail 2010", Daniel Gómez Flores pola súa fotografía titulada "Embustero y bailarín". O gañador foi agasallado con dous billetes Inter Rail na modalidade "Global Pass Flexi", que xunto á persoa que elixa lle permitirá percorrer en tren diferentes países europeos.
O programa de lecer xuvenil alternativo "Súbete ao Castro" celebrará mañá sábado a súa festa fin de curso no seu emprazamento habitual ao carón da pista de bicicletas de O Castro, segundo anunciou a concelleira de Xuventude, Iolanda Veloso. A partir das 18 horas sucederanse as actuacións do alumnado e profesorado, que rematarán ás 23 horas co Castroconcerto do grupo de punk rock Life in Green e de pop rock Frab Fly.
O prazo de inscrición para participar no programa "Verán Xove 2010" comeza o martes, 1 de xuño, e estará aberto ata o día 10 de xuño, segundo anuncia a Concellería de Xuventude. A documentación entregarase na Casa da Xuventude de 9 a 13.30 e de 17 a 19.30 horas, e ademais da ficha de inscrición é preciso presentar a fotocopia do DNI do pai, nai ou representante legal do menor, o volante de empadroamento do menor, unha foto tamaño carné do rapaz ou rapaza e unha fotocopia da súa tarxeta sanitaria.
O tenente de alcalde, Santi Domínguez, e a concelleira de Xuventude e Igualdade, Iolanda Veloso, clausuraron este venres o programa Empatía, no que participaron un total de 761 alumnos e alumnas de sete centros de ESO de Vigo e 15 profesores do IES Castelao. No acto os nacionalistas subliñaron que o eido da educación é un dos ámbitos fundamentais para promover a igualdade e destacaron a boa acollida que están tendo os programas que fomentan esta cultura nos centros educativos da cidade.
A concelleira de Igualdade, Iolanda Veloso, asinou este mércores unha nova edición do convenio coa asociación Dorna, que ascende a 19.000 euros. Tras a sinatura, na que participou a responsable da entidade Aurita González, a concelleira do BNG destacou que o seu obxectivo consiste en potenciar os servizos de información ás mulleres que desenvolve a asociación e fomentar a descentralización dos servizos que ofrece a administración.
A concelleira de Xuventude, Iolanda Veloso, presentou este martes unha nova edición do programa "Verán Xove 2010", que este ano oferta preto de 2.000 prazas, o 10% delas para rapaces e rapazas con necesidades educativas especiais. A edil nacionalista subliñou que esta proposta, que comeza xa no mes de xuño ao remate do curso escolar, ofrece 220 prazas máis que o ano pasado, co obxectivo de cubrir as necesidades da cidadanía e promover a conciliación da vida laboral e familiar. O prazo de inscrición é do 1 ao 10 de xuño.