mércores, 26 mai 2021
Os dous primeiros anos deste cuarto mandato de Abel Caballero estiveron marcados pola pandemia á que o Concello fixo fronte cunha actuación integral, “respondendo á confianza que depositaron en nós os cidadáns”. Durante a presentación do balance de goberno, Caballero lembrou que o proxecto político que encabeza ten un apoio do 90% da cidadanía o que demostra que “Vigo marcha unido”. En todo caso e ao marxe da covid, estes dous anos tamén foron os da confirmación dos grandes proxectos pendentes na cidade como a saída sur, o AVE por Cerdedo ou a Biblioteca do Estado.
venres, 14 mai 2021
O alcalde amosou esta mañá a súa satisfacción ao adiantar que o Concello xa dispón de todos os informes sectoriais perceptivos, o que garante a recuperación urbanística do Barrio do Cura, logo de medio século de espera. Trátase, dixo, dun “dos grandes avances urbanísticos na historia de Vigo”.
xoves, 13 mai 2021
O Concello xa ten en marcha o proceso de ordenación provisional do ámbito de Cruceiro onde se vai instalar Bricomart, do grupo Leroy Merlín. Esta actuación permitirá ao Concello recibir de xeito gratuíto un bulevar de 30 metros no que se integrará un carril bici, unha zona peonil e un parque.
venres, 7 mai 2021
O goberno local e o Colexio de Arquitectos de Galicia asinarán un convenio para cooperar na organización dunha “gran” exposición recordando ao arquitecto Miguel Pacewicz cando se cumpren cen anos do seu falecemento. Edificios como o Moderno, a Escola de Artes e Oficios ou a Casa Yañez son algúns dos seus emblemas na cidade.
mércores, 5 mai 2021
A Xunta segue sen convocar a reunión do Padroado que lle solicitaron tres membros do mesmo para facilitar a incorporación da Zona Franca. O rexedor criticou a actitude da Xunta de impedir a entrada dunha entidade que achegaría 5 millóns ao recinto feiral.
martes, 4 mai 2021
O Concello completará a senda do Lagares desde Manuel Álvarez ata a desembocadura do río antes de que remate o ano en curso. Así o explicou esta mañá o rexedor quen detallou que con este proxecto sumaranse 3,5 km de paseo cun investimento de 785.000 euros.
luns, 3 mai 2021
Abel Caballero asegurou esta mañá que a construción do túnel de Beiramar facilitará o tráfico de toda a cidade, beneficiando especialmente os accesos ao porto pesqueiro xa que permitirá conectar coa VG20 a través dunha rotonda baixo superficie. Na súa opinión, a Autoridade Portuaria oponse a esta infraestrutura por instrucións do presidente da Xunta, en contra dos intereses da cidade.
venres, 30 abr 2021
Abel Caballero recoñeceu esta mañá o compromiso do Goberno Central coas grandes proxectos pendentes en Vigo no transcurso dunha visita do secretario xeral de Infraestruturas, Sergio Vázquez. Entre outras cuestións, destacou o impulso ferroviario que está a vivir a cidade, co AVE directo a Madrid por Cerdedo ou a saída sur.
mércores, 28 abr 2021
A Corporación Municipal aprobou na sesión do mes de abril celebrada este mércores o Instrumento de Ordenación Provisional no ámbito do Polígono 32 do PERI IV-04 Calvario cos votos de PSOE e PP e a abstención do grupo mixto e do concelleiro non adscrito.
mércores, 28 abr 2021
O Goberno local defendeu a necesidade de transformar a zona de Beiramar soterrando o viario e favorecendo a calidade arquitectónica dos proxectos da zona. Tal e como explicou a concelleira de Urbanismo, hai que xerar espazos de socialización compatibles co acceso e funcionalidade da Autoridade Portuaria.