O goberno de Vigo acordou este venres interpoñer un recurso contencioso-administrativo contra a resolución de 29 de xullo de 2020 do xerente do Consorcio Galego de Servizos de Igualdade e Benestar pola que se obriga ao Concello a abonarlle máis de 100.000 euros polas escolas infantís que xestiona o ente autonómico en Valadares e rúa Palencia.
O alcalde avanzou esta mañá que o Concello está a punto de outorgar as bolsas de comedor e libros para este curso escolar, unha vez tramitadas as 5.562 solicitudes recibidas. Como vén sendo habitual, non quedará ningún estudante que cumpra os criterios sen achega, dado que non hai límite orzamentario nesta partida.
O curso escolar nas escolas municipais de música, teatro, danza e música tradicional comezará o próximo xoves 1 de outubro cun máximo de 20 alumnos por clase. Non se programarán actividades grupais, haberá entradas e saídas diferenciadas e se desinfectarán os instrumentos despois de cada uso.
Abel Caballero achegouse esta mañá ao CUVI para participar na apertura do curso universitario en Galicia 2020-2021, que este ano se organiza no campus vigués. Antes do acto, lembrou que tivo o “privilexio” de pronunciar a lección inaugural da Universidade de Vigo.
Segundo informou en rolda de prensa, a Federación Olívica de Asociacións de Nais e Pais de Alumnos e Alumnas de Vigo “segue esperando noticias” do goberno autonómico sobre os protocolos de actuación e medidas de apoio nos comedores escolares da cidade.
O Concello presta apoio aos centros escolares no regreso ás aulas con axentes da Policía Local que controlan o tráfico e tamén está a dispoñer espazos nas zonas de recreo que permitan garantir a distancia de seguridade entre o alumnado.
O goberno local aumentará en 617.000 euros o gasto en desinfección de colexios ante a negativa da Xunta de asumir esta responsabilidade. Todos os centros contarán con tres limpezas especiais diarias para o que suporá so neste ano 243.000 euros. En todo caso, o alcalde avanzou a decisión das principais cidades galegas de reclamar ao Goberno autonómico ese gasto.
A circulación rexistrou unha “absoluta normalidade” no primeiro día lectivo, no que o Concello enviou axentes da Policía Local a vinte centros educativos. O goberno de Vigo apoiará aos colexios delimitando os espazos para os recreos e cedendo instalacións municipais para a súa actividade. Abel Caballero ofreceu colaboración á comunidade educativa: “Estamos á súa disposición”.
Dúas mocións presentadas polo grupo do goberno de Vigo reclaman á Xunta de Galicia que se faga cargo do custo extraordinario de desinfección nos colexios -que presta o Concello e estima en 616.000 euros- e que abra unha mesa de diálogo coa Federación de ANPAS para dotalos de recursos para poder prestar o comedor escolar, aulas matinais e actividades extraescolares.
O Pleno aprobou esta mañá a moción socialista que reclama ao goberno autonómico que acometa nos colexios as reformas precisas para ampliar espazos que garantan a distancia interpersoal, o desdobramento de aula e a seguridade e tamén deu luz verde á moción do grupo mixto que demanda un curso escolar seguro.