martes, 10 mai 2011
Vigo albergará do 19 ao 25 de xuño a maior concentración de clubs da historia en disputa dunha competición dun deporte olímpico de equipo. O 27 Campionato de España de baloncesto infantil feminino celebrarase en catro recintos, Navia, As Travesas, Bouzas e o Polideportivo Universitario, e participarán por vez primeira 32 equipos polo título, con máxima representación galega ao clasificarse o campión de Galicia, Arxil Pontevedra, o Celta Maristas Novacaixagalicia (subcampión autonómico) e o Maristas Coruña, terceiro na Liga Galega.
venres, 6 mai 2011
O concelleiro de Deportes, Xabier Alonso, subiuse a unha bicicleta para promocionar, acompañado por ciclistas de todas as idades e de varios equipos de Vigo, a Decabike, a Festa da Bicicleta, que o domingo pola mañá sairá do aparcadoiro de Samil (10:00 horas) e que percorrerá varias rúas e avenidas da cidade co patrocinio de Decathlon.
mércores, 4 mai 2011
O concelleiro de Deportes, Xabier Alonso, presentou este martes a XXIV Festa do Karate, que se celebrará o vindeiro sábado 7 de maio no pavillón de Bouzas dende as 17 horas, organizada pola agrupación deportiva Zanshin. O concelleiro nacionalista salientou que serán máis de 350 deportistas os que participarán no evento, de 7 clubs da cidade e as Escolas Deportivas Municipais.
martes, 3 mai 2011
O concelleiro de Deportes, Xabier Alonso, adiantou este martes que o Sector do Campionato de España de cadete feminino celebrarase o vindeiro fin de semana, do 6 ao 8 de maio, no pavillón do Carballal. Esta competición enfrontará ao Club Carballal con outros tres equipos, de Valladolid, Madrid e Canarias, dos que só o gañador pasará á fase seguinte.
martes, 3 mai 2011
O alcalde, o tenente de alcalde, e o concelleiro de Deportes recibiron esta mañá aos xogadores e corpo técnico do Octavio-Pilotes Posada para expresarlles os seus parabéns polo ascenso do equipo á liga Asobal de Balonmán. No acto, celebrado no Auditorio Municipal, os tres destacaron o gran traballo feito ao longo da tempada polo club Octavio e ratificaron o respaldo ao club por parte da administración local.
martes, 26 abr 2011
O Club Maniotas, nomeado Vigués Distinguido 2011, organizará no Pavillón Central das Travesas, do 12 ao 14 de maio, a segunda etapa da Copa do Mundo senior de ximnasia estética de grupos, o Campionato do Mundo junior, a segunda etapa da Challenge Cup, proba tamén para grupos junior, e a EUSA Cup, é dicir, a Copa de Europa universitaria, que entra na súa quinta edición e que se celebra de xeito anual.
luns, 18 abr 2011
O concelleiro de Deportes, Xabier Alonso, presentou este luns a Festa da Bicicleta "Pedaleamos xuntos", que se celebrará o vindeiro 8 de maio, organizada por Decathlon. O concelleiro nacionalista destacou que se trata dunha "festa do deporte popular, neste caso do ciclismo", que sairá ás 9.30 horas dende a praia de Samil, chegará ao parque de Castrelos, e voltará ás 14 horas á praia de Samil.
venres, 15 abr 2011
A Vigo Cup atópase a un mes do peche de inscrición e xa conta con numerosas solicitudes para a undécima edición, que se xogará do 4 ao 10 de xullo. Equipos de Castela-León, Andalucía, Portugal continental e Azores xa reservaron aloxamento para competir na edición do décimo aniversario do evento, que comezou en 2001. Xabier Alonso, concelleiro de Deportes, asegurou que "este é un torneo consolidado; a competición é secundaria porque nenos e nenas van convivir nun torneo internacional que para moitos será a primeira vez que xoguen, e gozarán das Rías e de bos campos".
martes, 29 mar 2011
O concelleiro de Deportes, Xabier Alonso, presentou este luns a primeira edición da Copa de España de Grupos Show Trofeo Cidade de Vigo de Patinaxe Artística, que se celebrará os días 1 e 2 de abril no pavillón de As Travesas. O nacionalista destacou que esta nova competición reunirá a máis de 500 deportistas de 11 federacións autonómicas, das que a catalana e a galega son as máis numerosas.
xoves, 24 mar 2011
O concelleiro de Deportes, Xabier Alonso, participou este xoves na presentación do XII Trofeo Cidade de Vigo de Mountain Bike, integrada na VigoBikeContest, que se celebrará nos montes de Fragoselo de Coruxo o vindeiro fin de semana, 26 e 27 de marzo. O concelleiro nacionalista salientou o alto número de participantes cos que contará o descenso internacional, que se celebrará o domingo ás 12 horas, ao ter xa 250 preinscricións.
