venres, 15 abr 2011
A concelleira de Benestar Social, María Méndez, visitou este venres a Asociación Viguesa de Esclerosis Múltiple (Avempo), á que agradeceu o seu labor coas persoas que padecen esta enfermidade. A concelleira nacionalista expresou o seu compromiso a seguir colaborando con esta entidade para que poida seguir traballando na mellora da calidade de vida dos afectados e afectadas.
xoves, 14 abr 2011
O tenente de alcalde, Santi Domínguez, e a concelleira de Benestar Social, María Méndez, presentaron este xoves os acordos de colaboración con catro entidades que traballan no eido das drogodependencias, como son Érguete, Madro, Alborada e Médicos do Mundo, ás que se destinan un total de 180.000 euros. Os nacionalistas destacaron que pese aos recortes da achega efectuada pola Xunta para realizar estes programas, o Concello de Vigo mantivo o seu investimento e ademais logrou quintuplicar o número de usuarios e usuarias en catro anos nos programas de prevención, ao chegar a máis de 10.000 persoas neste curso 2010-2011.
venres, 8 abr 2011
A concelleira de Benestar Social, María Méndez, presentou este venres a xornada de prevención das drogodependencias "Eu son eu", dirixido a nenos e nenas de 12 anos. No transcurso do acto, a edil nacionalista transmitiu aos alumnos e alumnas de 6º de Primaria do colexio Salesianos a importancia de promover hábitos saudabeis e "saber dicir non" ante as diversas situacións que cada un e cada unha debe afrontar na nenez e na adolescencia.
martes, 5 abr 2011
A concelleira de Benestar Social, María Méndez, visitou este martes o curso de Risoterapia do programa de Avellentamento Activo que se está desenvolvendo no Centro Cívico do Casco Vello. A concelleira nacionalista amosou a súa satisfacción pola boa acollida que está a ter esta iniciativa, que considerou exemplo das políticas transformadoras postas en marcha polo BNG, xa que o programa de Avellentamento Activo desenvólvese actualmente en 24 asociacións veciñais de Vigo.
venres, 1 abr 2011
A concelleira de Benestar Social, María Méndez, afirmou este venres na apertura do curso "Manipulador de alimentos" que proporcionar información e formación é un dos obxectivos do proxecto Redess, posto en marcha no 2010 para coordinar o traballo das asociacións que desenvolven a súa laboura no eido da exclusión social severa. "Afondar na formación dos voluntarios e voluntarias é unha forma de mellorar a calidade dos servizos que se ofrecen", asegurou a concelleira nacionalista.
xoves, 31 mar 2011
A concelleira de Benestar Social, María Méndez, presentou este xoves os convenios asinados con cinco entidades sen ánimo de lucro da cidade que traballan no campo da discapacidade e a solidariedade internacional, como son as asociacións Doa, Down, Fundación Menela, Asociación de Persoas Xordas de Vigo e Solidariedade Galega co Pobo Saharaui. A edil do BNG salientou que a contía total destes convenios é de 106.300 euros, que supoñen "un empuxe necesario para as asociacións e porque nas subvencións fallan outras administracións".
luns, 14 mar 2011
A Concellería de Benestar Social presentará no pleno do vindeiro luns unha modificación de crédito de 350.000 para poder adquirir e adaptar os locais nos que se vai abrir un novo Centro Municipal de Servizos Sociais e continuar así achegando os servizos á cidadanía e mellorando a atención social. O centro estará na parroquia de Lavadores e nel habilitaranse novas Unidades de Traballo Social, seguindo co proceso de desdobramento que se ven realizando nas últimas semanas.
luns, 14 mar 2011
A concelleira de Benestar Social, María Méndez, fixo este luns balance do dispositivo de frío, aberto o pasado 9 de decembro no pavillón do Berbés, data dende a que rexistrou un total de 2.599 pernoctacións de 147 persoas diferentes. A edil do BNG anunciou ademais a apertura indefinida dun novo piso para mulleres co obxectivo de "dar resposta ás necesidades das mulleres que están na rúa".
xoves, 10 mar 2011
O tenente de alcalde, Santi Domínguez, presentou este xoxes os convenios bianuais asinados pola Tenencia de Alcaldía e a Concellería de Benestar Social coas asociacións Afán, Casa da Caridade, Vida Digna, Hermanos Misioneros e Banco de Alimentos, ás que se lles destinan un total de 150.000 euros. O nacionalista salientou o labor que fan estas entidades na xestión de comedores e reparto de alimentos nunha situación de crise como a actual colaborando coa administración para dar resposta ás necesidades das persoas.
mércores, 9 mar 2011
O tenente de alcalde, Santi Domínguez, e a concelleira de Benestar Social, María Méndez, inauguraron este mércores o remodelado Centro Municipal de Servizos Sociais do Casco Vello, ubicado na praza da Princesa. Segundo o nacionalista, a reforma feita neste centro amosa o compromiso da Tenencia de Alcaldía e a Concellería de Benestar Social na atención ás persoas e a mellora da calidade asistencial.