A Xunta de Goberno Loacal acordou este venres ampliar en 200.000 euros o orzamento das axudas de emerxencia. Así o anunciou Abel Caballero ao explicar que a dotación económica para 2024 ascende a 1.400.000 euros. “Eu dixen que as axudas terán recursos ilimitados e, por tanto, terán tantos recursos como se necesiten, dependendo das solicitudes que se fagan”, afirmou.
O goberno municipal aprobou este venres o plan "Vigo Emprega 2024”, por un importe de 896.000 euros, para contratar a 75 persoas. Empezarán a traballar no mes de novembro.
Caballero propón a Rueda que a semana que vén se reúna a Comisión de Infraestruturas para concretar as propostas de cara ao cofinanciamento do túnel desde Porta do Sol a Torrecedeira. O alcalde envioulle hoxe unha carta o presidente da Xunta.
O alcalde de Vigo inaugurou este xoves no cemiterio de Pereiró un novo espazo para depositar as cinzas de vigueses e viguesas que realizaron un traballo importante, notable e recoñecido en favor da cidade. “Queremos ter un espazo que, dentro da austeridade, sexa representativo do que Vigo aprecia de tantas persoas que traballaron pola cidade”, afirmou Abel Caballero.
"A profundidade esencial da terra. Benjamín Palencia, Manuel Colmeiro e o surrealismo dos anos trinta”, é a nova exposición do Museo de Arte Contemporánea, aberta na galería B3, que foi inaugurada este xoves polo alcalde de Vigo. A exposición, comisariada por Carlos L. Bernárdez, pon en relación de forma innovadora a obra de dous grandes artistas do século XX co surrealismo internacional. Na inauguración participou Alba Corral, en representación da familia e o legado do pintor Colmeiro. A mostra permanecerá aberta ata o 5 de xaneiro de 2025.
Este mércores, 25 de setembro, celébrase o Día Mundial do Farmacéutico baixo o lema Farmacéuticos: respondendo ás necesidades sanitarias globais; facilitando solucións locais, facendo referencia á capacidade da profesión farmacéutica de fortalecer os sistemas sanitarios axudando a responder aos desafíos sanitarios e sociais actuais que afectan á saúde da poboación. O Concello de Vigo súmase á xornada iluminando esta noite de verde as fontes de Aragón.
O alcalde abordou hoxe coa dirección da Asociación dos Premios da Crítica de Galicia as novidades da 46 edición dos galardóns que se entregarán no acto programado para o día 19 de outubro no teatro Afundación de Vigo. O presidente da asociación, Manuel Bragado, e as vicepresidentas, Malós Cabrera e Inma López Silva, explicaron a Abel Caballero a ampliación das modalidades de premios coa incorporación de tres ámbitos: ciencia e tecnoloxía; investigación en ciencias sociais e humanidades; e cultura dixital. O Concello subvenciona con 9.000 euros uns galardóns que desde 1978 recoñecen as achegas individuais e colectivas nas distintas expresións da creación cultural e da investigación en Galicia.
A comisión de axudas de emerxencia do Concello de Vigo aprobou este martes a concesión de 103 apoios por valor de 350.000 euros. “Seguimos atendendo á xente, e este ano prevemos dar máis número de axudas e máis montante económico que o ano pasado”, avanzou o alcalde.
O alcalde explicou este mércores que o goberno municipal “segue mellorando o servizo á cidadanía viguesa” habilitando cinco fiestras máis de atención cidadá no Rexistro a través das cales se poden xestionar trámites do padrón, entre outros.
O Concello responde á demanda das persoas maiores de contar coa actividade de baile a través da iniciativa “Bailes en Vigo”, dentro do programa "Vigo, Cidade Amiga dos Maiores". As sesións musicais realizaranse as fins de semana, a partir do venres 11 de outubro, nos locais municipais das asociacións veciñais.