O alcalde de Vigo en funcións, Lois Castrillo, Alfonso Paz Andrade, presidente do Comité Executivo da World Fishing Exhibition, e o conselleiro de Pesca, Enrique López Veiga, presentaron oficialmente a celebración desta exposición mundial que terá lugar en Vigo entre os días 17 e 21 do próximo mes de setembro.
O Consello da Xerencia de Urbanismo concedeu a licencia a un grupo de cooperativistas para a construcción de vivendas de protección oficial no polígono de Navia. Os beneficiarios son Vecinos de Vigo Sociedad Cooperativa de Viviendas e Porta do Atlántico Sociedade Cooperativa Galega de Vivendas.
A corporación en funcións prevé aprobar definitivamente a modificación puntual do Plan especial de ordenación do Porto formulada pola Autoridade Portuaria de Vigo, por iniciativa do Consorcio da Zona Franca e do Concello de Vigo. A sesión será o venres 6 de xuño ás 9:00 no salón de plenos.
A "Patrulla Ágila" do Exército do Aire realizará o venres ás 12.45 un ensaio na praia de Samil da exhibición aérea que terá lugar o domingo 8 de xuño e que organiza a Concellería de Cultura.
A Companhia Internacional de Teatro de Repertório Arte Livre pecha o programa teatral organizado pola Concellería da Muller e o Servicio de Normalización Lingüística. A cita é o venres 6 de xuño ás 21:00 no auditorio municipal da praza do Rei. O prezo é de 7 euros.
A soprano Ainhoa Zuazua acompañada ó piano de Francisco Borja darán o concerto de clausura do ciclo de música de novos intérpretes "Xeración 2000+3" que organiza a Concellería de Cultura. O concerto de carácter gratuíto comezará ás 20.30 horas do venres no auditorio do Conservatorio de Música de Vigo.
A Concellería de Festas e Animación Sociocultural, en colaboración con El Corte Inglés e a Escola Municipal de Danza, organiza o "IV Enxalzamento do traxe galego" o sábado 28 de xuño do 2003. Outorgaranse premios nas categorías de traxe antigo, moderno, de cotío e especial. O prazo de presentación de solicitudes para participar finaliza o 27 de xuño.
A Concellería de Normalización Lingüística organiza actividades infantís dentro do programa ¿Xogas? en galego podemos o venres 6 de xuño ás 18:30 na praza da Independencia co obxectivo de fomentar o uso da lingua galega entre os máis pequenos nun ambiente de lecer.