A Fundación Europea de Educación Ambiental concedeulles bandeiras azuis aos areais do Vao, Argazada, Tombo do Gato, A Punta e Canido. O esforzo do dispositivo do Goberno municipal, dos mariñeiros e voluntarios non conseguiu manter a distinción europea para a praia de Rodas, en Cíes, afectada pola marea negra.
O concelleiro de Xuventude en funcións, Santiago Domínguez, presentou o programa de campamentos organizados para este verán con actividades deportivas, de aventura e lecer para nenos de 4 a 14 anos. O prazo para inscribirse comeza o 2 de xuño na Casa da Xuventude e as prazas concederanse por orde de solicitude.
Máis de 7.000 vigueses foron beneficiarios do Plan municipal de emprego 2000-2003, segundo os datos que ofrece a memoria da Concellería de Desenvolvemento Local e Emprego, presentada polo concelleiro en funcións Delfín Fernández.
A Comisión de Goberno aprobou a concesión dunha axuda de 6.600 euros á Fundación Meniños para desenvolver o proxecto "Dereitos da infancia latinoamericana". O Concello de Vigo leva xa algúns anos colaborando con esta asociación que traballa para mellorar as condicións de vida dos menores nos países subdesenvolvidos de Sudamérica.
O programa cultural de teatro con temática relativa á muller celébrase esta semana no auditorio municipal coa colaboración da Concellería da Muller e do Servicio de Normalización Lingüística. O martes 3 de xuño ás 21:00 estréase unha adaptación de "A volta do parafuso", de Henry James.