martes, 14 xul 2009
O tenente de alcalde, Santi Domínguez, e a concelleira de Benestar Social, María Méndez, asinaron hoxe tres convenios de colaboración coa Asociación de Persoas Xordas, a Fundación Menela e a Asociación de Familiares de Enfermos de Alzheimer (Afaga) que teñen como obxectivo avanzar na integración e mellora da calidade de vida das persoas con algún tipo de discapacidade, así como das súas familias.
xoves, 9 xul 2009
O tenente de alcalde, Santi Domínguez, e a concelleira de Benestar, María Méndez, compartiron hoxe unha parte da xornada cos nenos e nenas que participan no campamento "Verán de lecer" para persoas con discapacidade. Santi Domínguez salientou que este iniciativa é un claro exemplo "da nosa aposta pola integración real e por que a igualdade de oportunidades para todos e todas se materialice día a día".
xoves, 9 xul 2009
Co obxectivo de avanzar na elaboración do I Plan de Integración Social, Convivencia Intercultural e Cidadanía de Vigo hoxe celebrouse unha xornada de traballo na que participaron representantes de entidades e asociacións de emigrantes, así como técnicos e profesionais do sector. Na inauguración o tenente de alcalde, Santi Domínguez, quixo poñer en valor o traballo que se está a desenvolver desde a Concellería de Benestar en colaboración con todos eles para que Vigo conte por primeira vez cun plan de inmigración.
martes, 7 xul 2009
O dispositivo de acceso ao baño para persoas con mobilidade reducida prestarase este ano por primeira vez tamén na praia de O Vao. O tenente de alcalde, Santi Domínguez, salientou na presentación que "quixemos ampliar o servizo, que xa se viña prestando en Samil, para continuar avanzando na integración real das persoas que teñen algún tipo de discapacidade".
mércores, 1 xul 2009
A concelleira de Benestar Social, María Méndez, anunciou este mércores a posta en marcha do primeiro programa de actividades interxeracionais de verán ao aire libre, que se desenvolverá en diferentes barrios da cidade ao longo dos meses de xullo e agosto. Danzas do mundo e tai chi son as dúas actividades que se celebrarán na Praza da Independencia, O Calvario, avenida de Castelao, Praza de Compostela e alameda de Bouzas, de luns a venres e sempre de 10.30 a 11.30 horas.
xoves, 25 xuñ 2009
O tenente de alcalde, Santi Domínguez, e a concelleira de Benestar Social, María Méndez, presentaron este xoves o primeiro programa municipal de transición á vida autónoma co que conta a cidade de Vigo. Esta iniciativa consiste na posta en marcha de dous novos pisos de acollida para 13 persoas en risco social ou que xa están excluidas socialmente e no seguimento por parte de profesionais para conseguir a súa plena integración social.
xoves, 18 xuñ 2009
A concelleira de Benestar Social, María Méndez, anunciou este xoves que o primeiro programa de campamentos de verán para persoas con discapacidade que organiza o Concello de Vigo oferta ata un máximo de 210 prazas. A edil explicou que esta iniciativa, denominada "Verán de lecer" e dirixida a persoas con discapacidade empodroadas no Concello de Vigo de máis de 6 anos, se desenvolverá no mes de xullo no Colexio Saladino Cortizo e nos mes de agosto nas instalacións de APAMP.
mércores, 17 xuñ 2009
O tenente de alcalde, Santi Domínguez, e a concelleira de Benestar Social, María Méndez, asinaron este mércores tres convenios de colaboración cos responsables da Asociación Afán, o Comedor da Esperanza e os Hermanos Misioneros por un importe total de 120.000 euros. Segundo explicou o tenente de alcalde, estes convenios teñen o obxectivo de axudar a estas entidades na atención aos máis desfavorecidos e paliar os efectos da crise. Santi Domínguez adiantou que o vindeiro ano se reforzarán os orzamentos de Benestar Social.
xoves, 11 xuñ 2009
O tenente de alcalde, Santi Domínguez, e a concelleira de Benestar Social, María Méndez, inauguraron este xoves en Coia o primeiro Centro Municipal de Servizos Sociais construido nun distrito da cidade. Este novo centro, que atenderá unha poboación de 75.000 persoas, aglutina as unidades básicas de atención social de Coia, Castrelos, Navia e Litoral, cumprindo así o obxectivo subliñado polo tenente de alcalde de "descentralizar os servizos municipais, achegándoos á cidadanía".
martes, 2 xuñ 2009
A Concellería de Benestar Social desenvolve a campaña "De Boa Man", na súa IX edición os días 2,3,4 e 5 de xuño de 2009. O proxecto consiste na instalación de tres carpas na rúa Príncipe, onde oito asociacións de persoas con discapacidade exporán e venderán os productos que realizan.
