O Concello outorgou na última semana decenas de axudas ao aluguer, alimentos, auga e luz a familias sen recursos
Abel Caballero explicou este xoves que o goberno local, ao longo da última semana, concedeu a familias con escasos recursos económicos 20 axudas de emerxencia para o aluguer, 7 para abonar recibos da auga, outras 17 achegas para o pago da enerxía e 35 axudas para alimentación. O alcalde salientou que Vigo aplica "a política social máis de esquerdas que se fai en ningún municipio de España".
Caballero explicou que as 20 axudas económicas para o pago de aluguer son de 270 euros de media, os apoios para o pago da auga e da enerxía eléctrica ascenden a 70 euros de media, mentres que as de alimentación son de 90 euros. O alcalde avanzou ademais que o goberno local ven de solventar un desafiuzamento e en próximos días agarda resolver outros dous casos.