A Xunta aprobou ademais un convenio de colaboración coa Fundación de Secretariado Xitano en materia de fomento de emprego e formación e unha ordenanza municipal sobre captación e aproveitamento da enerxía solar.
A Xunta de Goberno Local aprobou o proxecto "Actívate", co que se pretende favorecer a inserción laboral no ámbito de servizos de persoas con necesidades especiais, como son as mulleres con dificultades neste campo e os colectivos en situación ou en risco de exclusión social. O proxecto contará cun orzamento duns 640.000 euros.
A Xunta de Goberno Local acordou a participación do Concello na convocatoria da Deputación Provincial de Pontevedra para as axudas de "Emerxencia Social". Estas axudas están destinadas a familias con problemas de tipo socioeconómico para o acondicionamento de vivendas.
En materia de Xuventude a Xunta aprobou tamén un convenio de colaboración co Plan Comunitario de Teis para o desenvolvemento de dúas actividades de carácter xuvenil no verán 2005.
A Xunta de Goberno Local autoriza o persoal da Policía Local para realizar 10 xornadas adicionais ás legalmente previstas. Ademais, aprobou a disposición, por parte do Concello, de 38.000 euros para a prevención de drogodependencias.
A Xunta de Goberno Local aprobou o prego de condicións para o concurso de adxudicación do Auditorio-Pazo de Congresos que se construirá na avenida de Beiramar. Ademais, deu o seu visto bo á colaboración coa Asociación de Veciños Eduardo Chao para o fomento da participación cidadá e o lecer.