xoves, 7 out 2010
O concelleiro de Deportes, Xabier Alonso, presentou hoxe o Gran Premio Internacional de Judo Cidade de Vigo, que terá lugar este sábado 9 de outubro no pavillón do Berbés. O nacionalista destacou a importancia de que Vigo sexa a sede deste acontecemento deportivo, "transformado nesta ocasión en Copa de España na categoría cadete", e no que competirán arredor de 300 deportistas, 50 deles galegos.
mércores, 6 out 2010
O tenente de alcalde, Santi Domínguez, en resposta aos medios sobre a celebración en Vigo da Copa Asobal, manifestou que "non é unha sorpresa" que Asobal se fixara en Vigo para celebrar a Copa, que terá lugar os días 18 e 19 de setembro. O nacionalista asegurou que vai ser un acontecemento moi importante a nivel deportivo "pero tamén de promoción da cidade".
mércores, 6 out 2010
O tenente de alcalde, Santi Domínguez, anunciou hoxe que o novo complexo deportivo "Máis que auga" de Coia-Florida entrará en servizo na última semana de outubro. O nacionalista destacou este mércores nunha visita ás instalacións que xa máis de 7.000 persoas amosaron o seu interese por algunha das actividades que terán lugar neste centro ubicado na Praza da Tellada (nas inmediación da Praza da Miñoca) e no de Barreiro.
xoves, 30 set 2010
O concelleiro de Deportes, Xabier Alonso, anunciou hoxe que o vindeiro luns, 4 de outubro, comezará unha nova edición do programa "Corre con Vigo", que se desenvolverá no parque de Castrelos, na explanada fronte o auditorio. O edil nacionalista salientou que con esta iniciativa, a Concellería de Deportes quere cumprir o obxectivo de "potenciar o deporte entendido como saúde".
mércores, 22 set 2010
O Concello de Vigo recibiu o premio á mellor actividade ou programa deportivo pola organización do Foro Mundial FISU que se celebrou na nosa cidade no pasado mes de xuño. O galardón foi concedido por unanimidade polo xurado dos I Premios Galicia á Xestión Deportiva da Asociación Galega de Xestores Deportivos, que presidía Eduardo Blanco Pereira.
luns, 20 set 2010
O tenente de alcalde, Santi Domínguez, e o concelleiro de Deportes, Xabier Alonso, mantiveron hoxe unha xuntaza co presidente do Celta, Carlos Mouriño, e o vicepresidente Ricardo Barros, para analizar a situación dos proxectos da remodelación do estadio de Balaídos e da cesión do campo de Barreiro para uso dos equipos de Lavadores. Santi Domínguez explicou que a reforma de Balaídos está pendente da decisión sobre a sede do Mundial do 2018 ou 2022 á candidatura ibérica España-Portugal e anunciou que se están producindo avances con respecto a Barreiro.
venres, 17 set 2010
O concelleiro de Deportes, Xabier Alonso, presentou hoxe a primeira edición da Xornada Siareira, que se celebrará no hotel Coia ao longo do vindeiro día 25 e que pretende "achegar os clubs aos siareiros", segundo dixo. "É un sector do deporte que non se visibiliza e queremos dar voz aos que non a teñen para que fagan chegar as súas preocupacións e suxestións", explicou o concelleiro e presidente da Fundación VIDE.
mércores, 15 set 2010
A segunda edición do Medio Maratón Cidade de Vigo xa está en marcha. O concelleiro de Deportes, Xabier Alonso, presentou hoxe o evento xunto co organizador, Omar Lorenzo, e os patrocinadores privados, Ibercaja e Coca-Cola. A carreira atlética, tamén pertencente ao Circuíto Cidade de Vigo de carreiras populares, está programada para o vindeiro día 26, con peche de inscrición o día 22. O prezo para participar será este ano de 10 euros e a organización, Prime Time, aspira a ter en liña de saída a uns 450 deportistas.
mércores, 15 set 2010
O concelleiro de Deportes, Xabier Alonso, recibiu hoxe aos equipos infantís masculino e feminino do Seis do Nadal-Coia de baloncesto, protagonistas dunha grande final da tempada pasada. O Seis do Nadal meteuse por vez primeira na súa historia nunha fase final do campionato estatal masculino e as mozas chegaron ata o interautonómico.
xoves, 9 set 2010
O concelleiro de Deportes, Xabier Alonso, recibiu hoxe no Concello a Jorge Casales, novo campión de Europa xuvenil de trial, ao que felicitou polos éxitos acadados este verán. Casales, vigués de 15 anos, gañou o Europeo da súa idade ao imporse en Coazze (Italia) e La Rabassa (Andorra), acabando segundo en Tanvald (Chequia).