mércores, 16 feb 2011
O programa de artes escénicas que organiza a Concellería de Cultura e Animación Sociocultural no Auditorio Municipal continúa mañá, 17 de febreiro, cun espectáculo de danza contemporánea para todos os públicos. Trátase da obra "Sono silente", que representará a compañía Bstudiodanza ás 20.30 horas. O prezo das entradas é de 5 euros, e poden mercarse na web www.laboleteria.es ou na taquilla unha hora antes do comezo da actuación.
martes, 15 feb 2011
Co apoio da Concellería de Cultura, un grupo creativo formado por mozos e mozas que coincidiron estudando Comunicación Audiovisual na Universidade de Vigo presentará o xoves, 17 de febreiro ás 19 horas, na Casa Galega da Cultura, a curtametraxe "Camiño da memoria". O traballo, centrado no Alzheimer, foi premiado o ano pasado co Amal Express no festival de cine euroarabe Amal, e obtivo a Mención Honorífica da Sociedade galega de xerontoloxía e xeriatría. A entrada será de balde, até completar aforo.
"CANTIGA DE VELLAS". DOMINGOS DE FEBREIRO PARA NENOS DE 5 A 12 ANOS. DE 12.00 A 13.30 HORA 1 € / ASISTENTE
venres, 11 feb 2011
Para conmemorar o 75 aniversario do pasamento de Valle-Inclán, o museo Verbum oferta unha completa programación de actividades que xiran ao redor da súa figura. Así, poderemos ver a exposición temporal "Valle-Inclán, Palabra e Imaxe" ata o vindeiro 27 de febreiro, ouvir a conferencia de Siro López, autor das ilustracións da exposición (18 de febreiro ás 20h) e participar nos obradoiros dos domingos deste mes, "Cantiga de Vellas", o seu único poema en galego.
venres, 11 feb 2011
A programación de artes escénicas que a Concellería de Cultura e Animación Sociocultural organiza no Auditorio Municipal ofrece este fin de semana dúas propostas ben diferentes. Mañá, 12 de febreiro, ás 21 horas, terá lugar o espectáculo "Moxenas musical galego"; o domingo, a compañía Berrobambán representará a obra "Bicharada", dirixida ao público infantil. Nos dous casos as entradas pódense adquirir na web www.laboleteria.es ou na propia taquilla unha hora antes do comezo das actuacións.
xoves, 10 feb 2011
A exposición "Quiñones de León: unha nova pinacoteca para a Galicia" poderase visitar ata o 13 de marzo na Casa das Artes. A mostra é unha selección de 83 obras da colección municipal da plástica galega dos séculos XIX e XX e é un avance da exposicón permanente que albergará a nova Pinacoteca.
xoves, 10 feb 2011
O Auditorio Municipal acolle mañá, 11 de febreiro, unha nova obra teatral do programa "Con T de Teatro", dentro da programación estable de artes escénicas que organiza a Concellería de Cultura e Animación Sociocultural. Nesta ocasión será a comedia "Life is a paripé", que a compañía Obras Públicas representará ás 21 horas. As entradas pódense adquirir na web www.laboleteria.es ou na propia taquilla unha hora antes do comezo da actuación e o seu prezo é de 7 euros.
mércores, 9 feb 2011
O concelleiro de Cultura, Xesus López, presentou este mércores o I Concurso de Gaita para Solistas Concello de Vigo, para o que as persoas interesadas poden inscribirse dende mañá, 10 de febreiro, ao 1 de abril. A fase final do concurso celebrarase o 30 de abril no Auditorio Municipal. Segundo o nacionalista, con esta iniciativa, que se pon en marcha coa colaboración da Agrupación de Centros Deportivos e Culturais de Vigo, dase resposta a unha "eiva histórica" no eido da música tradicional.
ARTISTAS PARTICIPANTES MÓNICA ORTÚZAR - ELENA MENDIZÁBAL - ANA GESTO- SOL ALONSO - IGNACIO BARCIA - PABLO HUERTAS - PELLO MITXELENA
mércores, 9 feb 2011
Co título Materialización, a Fundación Laxeiro presenta esta exposición que é o resultado do traballo de investigación dun grupo de artistas, membros das Universidades de Vigo e o País Vasco, que levan oito anos traballando en equipo, ao redor da idea de pensamento/creación/materialización.A mostra poderase ver na sala B da Fundación Laxeiro do 11 de febreiro ó 15 de maio.<br />
martes, 8 feb 2011
A programación estable de artes escénicas que organiza a Concellería de Cultura continúa no Auditorio Municipal coa comedia "Os Clocló", do programa "Vigo a escena". A compañía Lambríaca representará esta obra mañá e xoves, 9 e 10 de febreiro, ás 20.30 horas. O prezo das entradas é de 7 euros e pódense adquirir na web www.laboleteria.es ou na propia taquilla unha hora antes do comezo da actuación.
luns, 7 feb 2011
O pasado domingo, o alcalde e concelleiros municipais participaron no Auditorio do Conservatorio Profesional de Música na ceremonia de entrega dos galardóns da sexta edición do Premio David Russell para Novos Talentos, onde participaron 44 músicos de entre 8 e 25 anos procedentes de toda a Península Ibérica. Esta actividade ten finalidade solidaria e os fondos recabados polas matrículas destinaranse a unha escola sen recursos de nenos discapacitados na India.
