A Xunta de Goberno de Vigo aprobou hoxe a convocatoria para cubrir os 75 postos da oferta de traballo do “Plan Municipal de Emprego” de 2025, que ten un presuposto de 1.375.000 euros. “Un plan que durante nove meses permitirá dar capacitación profesional a 75 persoas para que continúen a súa vida laboral en empresas a través da súa propia iniciativa”, destacou Abel Caballero.
O alcalde acudiu á entrega de premios de Faro da Escola, onde o galardón do "mellor xornal" foi para a Aula do Hospital Álvaro Cunqueiro. No pavillón de Navia déronse cita ao redor de 1.400 estudantes de 40 colexios da provincia de Pontevedra onde amosaron o seu traballo na realización dun xornal. Caballero explicoulles que "deben sentir orgullo" de ser bos e boas estudantes" e agradeceu ao profesorado o seu labor na docencia e implicación co alumnado e co proxecto promovido por Faro de Vigo.
O rexedor recibiu aos equipos de fútbol 11 e fútbol 7 que van competir nos campionatos de España Master en Benidorm e Salamanca. Desexoulles sorte e felicitounos polo patrocinio e asociación das súas empresas "que levan a Vigo polo mundo adiante".
O programa municipal de coidadores de barrio prestou ata o día 31 de maio un total de 6.066 servizos e atendeu a 284 usuarios con idades de entre 60 anos e máis de 90. “Está a prestar un importantísimo servizo na cidade”, destacou Abel Caballero.
As fontes de Aragón ilumínanse mañá 11 de xuño polo Día Internacional da síndrome do KBG. A conmemoración ten como obxectivo concienciar sobre esta enfermidade xenética rara que afecta ao desenvolvemento físico e cognitivo, ademais de reclamar o fomento da investigación e ofrecer apoio ás persoas afectadas e ás súas familias.
O vindeiro luns 16 de xuño arrincará o servizo especial de reforzo do transporte público urbano ás praias de Vigo. Estará operativo durante toda a semana ata setembro para facilitar á cidadanía unha alternativa cómoda, segura e sostible ao vehículo privado. “Dez liñas que chegan directamente ás praias”, destacou o alcalde.
Abel Caballero lembrou este mércores as xestións e contactos que mantivo nos últimos días co ministro de Xustiza para que a planta xudicial de Vigo conserve os 8 xulgados de instrución e sume un novo en violencia contra a muller, á vez que incidiu na reclamación á Xunta para que atenda a demanda histórica de asumir o financiamento que lle corresponde para implantar gardas de 24 horas nos xulgados.
“Demandamos unha facultade de Medicina na Universidade de Vigo e no campus de Vigo e de aí non nos imos mover”, declarou o alcalde, que considera que esta situación en Galicia debe ser única en España.
O alcalde saudou este martes aos participantes nas xornadas dos coordinadores informáticos das direccións provinciais do SEPE de toda España que se celebran en Vigo. Durante dous días, analizan os novos proxectos informáticos do organismo.
No marco dunha visita de cortesía, Abel Caballero mantivo un encontro este martes con Eulalia González Peña, subdirectora xeral do gabinete técnico da Policía Nacional, acompañada de parte do seu equipo, con quen puido abordar a operatividade da Policía Nacional e a importancia da súa colaboración co corpo da Policía Local da cidade, unha cooperación que o rexedor pon en valor polo seu alcance positivo.