Xornal Vigo

martes, 4 maio 2010

Deportes

O vernes celebrarase un acto de recoñecemento ao deporte vigués polo Premio Nacional do Deporte

O Premio Nacional do Deporte, que onte luns recibiu unha representación do Concello de Vigo, encabezada polo alcalde Abel Caballero, será compartido con todo o mundo do deporte vigués nun acto que se celebrará o vindeiro venres no pavillón das Travesas a partir das 20 horas. O tenente de alcalde, Santi Domínguez, quixo salientar este martes que é un premio de todos os vigueses e viguesas, polo que é preciso que toda a cidade o celebre nun acto colectivo.

Persoal

Carlos Font presenta unha campaña de fomento da administración electrónica que inclúe trípticos informativos e a entrega de 1.000 lectores de DNI

martes, 4 mai 2010

O concelleiro de Xestión Municipal, Carlos López Font, presentou hoxe martes unha campaña municipal para fomentar o uso da páxina web do Concello (www.vigo.org) para realizar os trámites municipais mediante o novo DNI electrónico. A iniciativa contempla a divulgación de trípticos informativos e a entrega de balde de 1.000 lectores do novo documento, que terá lugar desde mañá mércores na lonxa do Concello a todo aquel empadroado que o solicite.

Medio Ambiente

Medioambiente instalará sete puntos de observación de aves ao longo do paseo do Lagares

martes, 4 mai 2010

A responsable do departamento municipal, Chus Lago, explicou este martes as melloras "moi demandadas pola cidadanía" realizadas ao longo do paseo, como a canalización das augas pluviais para evitar o encharcamento, desbroce e limpeza; e anunciou novas medidas, como a instalación dunha nova ponte nas proximidades da depuradora e de cinco novas fontes máis. O Concello inviste nestas actuacións 165.000 euros.

Patrimonio Histórico

Eudosio Álvarez presenta o seminario do CAT "Artífices sen nome" como homenaxe aos canteiros

martes, 4 mai 2010

O concelleiro de Patrimonio Histórico, Eudosio Álvarez, presentou este martes o seminario do Centro de Artesanía Tradicional destinado ao profesorado "Artífices sen nome, os construtores da arquitectura en pedra", que comezará mañá na Casa Galega da Cultura. O nacionalista asegurou que esta iniciativa "quere ser unha homenaxe aos canteiros, que na súa maioría non pasaron á historia".

Medio Ambiente

Chus Lago programa actividades de sensibilización medioambiental para 200 nenos de Vigo e dos Ancares

martes, 4 mai 2010

Por mor do Ano Internacional da Biodiversidade, a Concellería de Medioambiente programou actividades ambientais de balde entre os días 14 e 17 deste mes, onde convivirán 50 nenos dos Ancares e 150 de Vigo de entre 9 e 12 anos en VigoZoo e nunha acampada nas Illas Cíes. 25 monitores traballarán cos nenos no programa, que pecha a súa inscripción esta semana. A actividade completarase en setembro, cunha visita dos rapaces de Vigo aos Ancares.

Deportes

Xabier Alonso felicita aos clubs Balonmán Lavadores e Seis de Nadal polo seu ascenso á primeira categoría

martes, 4 mai 2010

O concelleiro de Deportes, Xabier Alonso, expresou este martes os seus parabéns aos clubs Unión Balonmán Lavadores e Magope Seis do Nadal polo seu ascenso á primeira categoría este pasado fin de semana. Nunha recepción que tivo lugar no Concello de Vigo, e na que participaron os deportistas dos dous clubs e integrantes das súas directivas, o nacionalista salientou o traballo que están a facer polo deporte de base.

Cultura

Desde o mércores xa se poden adquirir os abonos para o Festival de Jazz de Vigo "Imaxina Sons"

martes, 4 mai 2010

A partir do mércores, 5 de maio, xa está activo o servizo de venda de abonos para o 6º Festival de Jazz de Vigo "Imaxina Sons". Este ano incorpora importantes novidades xa que se poderá adquirir un abono para os concertos do festival que teñen lugar en MARCO (3 concertos) e Auditorio Municipal (4 concertos) ademais do habitual abono para as 3 actuacións que teñen lugar na Sala de Concertos do Centro Cultural Caixanova. Quen desexe adquirir os dous abonos (10 concertos en total) obterá unha bonificación do 15% na compra telefónica.