A concelleira da Muller, Lucía Molares, deu conta de dous convenio de colaboración que aprobou hoxe a Xunta de Goberno Local con Feministas Independentes Galegas para o II Premio de investigación e co grupo de estudios sobre a condición da muller Alecrín para garantir o libre acceso ó centro de documentación e biblioteca Alecrín.
O pleno da Corporación Municipal aprobou hoxe por aclamación conceder a medalla da cidade de 2004 á Asociación Nacional de Fabricantes de Conservas de Pescado e Mariscos (ANFACO) "en recoñecemento a súa prolongada labor de 100 anos a prol da primeira industria da cidade". A medalla entregarase o próximo día 27 de marzo no transcurso dunha cerimonia con motivo do Día da Reconquista.
O corpo de Bombeiros celebrou hoxe a festividade de San Juan de Dios, o seu patrón, cunha misa solemne no Fogar e Clínica San Rafael, á que seguiu unha exhibición dos vehículos que posúe o corpo e do persoal do servicio ós nenos con discapacidade do centro. O acto contou coa presencia da alcaldesa de Vigo, Corina Porro, e mailo concelleiro de Mobilidade e Seguridade, Antonio Coello.
Un total de 30 millóns de euros serán investidos na rehabilitación da zona vella de Vigo pola Xunta de Galicia, a Zona Franca e o Concello de Vigo, segundo recolle o convenio aprobado hoxe pola Xunta de Goberno Local na súa reunión semanal.
"Castrelos Inédito. Obras na reserva do museo municipal de Vigo 1950-2000" é a exposición que dende o 9 de marzo ó 11 de abril poderase visitar na Casa das Artes.