O alcalde celebra a licitación do último tramo da alta velocidade entre Vigo e Oporto
O Ministerio de Transportes vén de sacar a licitación a redacción do estudo informativo do tramo que quedaba pendente da Saída Sur, o que discorre entre O Porriño e a fronteira portuguesa.
“O Ministerio de Transportes segue cumprindo coa cidade de Vigo”, apuntou Caballero este venres, ao dar conta deste novo trámite administrativo que supón que o Ministerio “está a cumprir os prazos que pactamos na última reunión”, celebrada o 19 de febreiro deste ano 2025, cando os técnicos se comprometeron co Concello a que o estudo informativo sairía antes de 6 meses.
O Ministerio de Transportes licita por case un millón de euros a redacción do estudo informativo do corredor atlántico da alta velocidade no tramo que discorre entre O Porriño e a fronteira portuguesa, que é o último pendente na parte española do AVE entre Galicia e OPorto. O rexedor lembrou que xa está en tramitación o tramo do tren de alta velocidade ata O Porriño e agora o sae o último tramo ata o río Miño. Os traballos terán un prazo de execución de 24 meses.