xoves, 10 decembro 2009

O alcalde salienta que a humanización da rúa Marín "mellorou substancialmente" o transporte público na zona

Abel Caballero encabezou a delegación municipal na inauguración da rúa Marín, en Coia, cun investimento de 1,1 millóns de euros e emprego para 39 persoas, das que 11 procederon das listas do INEM de Vigo. O alcalde mostrou a súa "satisfacción" polo resultado da mellora, que converte á de Marín "nunha das humanizacións máis fermosas de Vigo". O novo sistema circular, indicou Caballero, "mellorou substancialmente" o transporte público na zona.

Eudosio Álvarez explica que a nova tasación dos tres edificios da pinacoteca fixa a adquisición en 1.575.000 euros

xoves, 10 dec 2009

O concelleiro de Patrimonio Histórico, Eudosio Álvarez, explicou este xoves que a segunda tasación encargada polo propietario dos inmobles que o Concello de Vigo adquirirá para instalar a nova pinacoteca da cidade pecha a adquisición dos tres edificios en 1.575.000 euros. Segundo afirmou o edil do BNG os dous factores que explican a pequena rebaixa respecto á primeira son a baixada de prezos no sector inmobiliario nos cinco meses que separan as dúas tasacións e a calificación urbanística do número 8 da rúa Abeleira Menéndez como "ben de carácter dotacional", tal e como recoñece a empresa tasadora no seu informe.

O tenente de alcalde acompaña aos voluntarios turísticos nunha clase práctica cun percorrido pola ría a bordo do Hidria

xoves, 10 dec 2009

O tenente de alcalde e concelleiro de Turismo, Santi Domínguez, informou este xoves de que un grupo composto por 25 maiores de 65 anos está a participar no curso de Voluntariado Turístico. Precisamente unha das actividades formativas que se enmarca neste curso tivo lugar hoxe a bordo do barco Hidria Segundo e consistíu nun percorrido pola ría de Vigo, no que os participantes puideron coñecer diferentes aspectos sobre a ría, a actividade portuaria ou os estaleiros.

Iolanda Veloso anuncia que o contorno do mercado do Calvario acollerá o sábado actividades para dinamizar o galego

xoves, 10 dec 2009

A concelleira de Normalización Lingüística, Iolanda Veloso, anunciou hoxe que o sábado, 12 de decembro, o colectivo Convers-ando desenvolverá unha xornada de actividades "a prol da dinamización da lingua galega". Na presentación da xornada, na que participou tamén a representante do colectivo María Reimóndez, a concelleira afirmou que Convers-ando "é unha das iniciativas sociais que xurdíu no noso país a consecuencia das políticas desenvolvidas ou anunciadas sobre política lingüística polo Goberno galego".