Abel Caballero fixo balance este luns da acción dos seus gobernos desde que chegou á alcaldía no ano 2007. “O máis importante que sucedeu na miña vida profesional é ser alcalde de Vigo”, apuntou.
A aprobación do novo planeamento urbanístico foi un dos fitos destacados polo alcalde de Vigo na presentación do seu balance de xestión. Este documento permitirá a construción de 15.000 vivendas sometidas a algún tipo de protección e duplicará as zonas verdes da cidade.
No balance de goberno reivindicou o Nadal, así como a Reconquista – na que se conseguiu a Declaración de Festa de Interese Nacional – ou os concertos de Castrelos, “cos artistas máis relevantes do panorama actual”. O alcalde puxo en valor os premios que recibe a cidade por obras como o HALO ou a nova potabilizadora: “Cada vez que nos presentamos a algo gañamos”. Outra gran acción no medioambiente foi a transformación de VigoZoo en VigoNature, unha gran aula de educación ambiental e o traballo para que as Illas Cíes sexan declaradas Xeoparque Mundial da UNESCO.
O rexedor vigués adicou unha parte importante do balance de 4 lexislaturas máis dous anos de goberno a repasar a situación do sector deportivo e cultural.
Abel Caballero destacou hoxe os investimentos do goberno municipal destinados a mellorar as infraestruturas dos colexios da cidade e propiciar tanto a mellora no coñecemento de idiomas, con 2.000 beneficiarios das becas, como na formación das nenas e dos nenos en múltiples disciplinas. Destacou a aposta polos programas pioneiros de Política Social para atender as persoas vulnerables.