Abel Caballero resaltou hoxe a Vigo como "a gran capital centro dun territorio de 6 millóns de habitantes, entre A Coruña e Oporto. Tal e como dixo en rolda de prensa, a Xunta de Galicia debería ter en conta que "a competencia ao aeroporto do norte de Portugal hai que facela desde esta cidade".
A última película do director vigués Juan Pinzás estrénase mañá venres nos cines Gran Vía, unha boa oportunidade para "sentirnos orgullosos dun vigués que presenta as súas obras na súa cidade natal", dixo o alcalde. O director detallou características da que é o seu oitovo filme, ao tempo que o rexedor destacaba a súa capacidade artística e creativa.
Caballero invitou este xoves á cidadanía a encher mañá o Pavillón das Travesas e apoiar ao Real Club Celta na consecución do pase á final da Liga de Fútbol Indoor. O encontro, ás 21 horas, medirá aos de Moncho Carnero contra o Oporto, equipo contra o que xa se enfrontou na fase de grupos, con derrota para os de Vigo.
Abel Caballero acompañou hoxe xoves ao seu homólogo de Oporto na presentación da edición 2013 do circuito Boavista de Portugal, que contará coa participación de quince pilotos españois. O evento terá lugar durante dous fins de semana do mes de xuño en Oporto.
O Festival Folclórico Internacional, froito do convenio de colaboración entre a concellería de Cultura e Festas e a Asociación Cultural Interfolc, que chega á súa décimo novena edición, abre o prazo de solicitudes de actuacións, que terán lugar entre o 6 e o 11 de agosto. O festival inclúese na programación das Festas do Verán.