luns, 4 outubro 2010

Caballero subliña que o traballo da Policía Local e Bombeiros permitiu atender máis de 200 incidencias causadas polo temporal

luns, 4 out 2010

O alcalde de Vigo eloxiou este luns o traballo realizado polos axentes da Policía Local e os efectivos de Bombeiros durante o temporal que asolou Vigo e Galicia principalmente na pasada xornada do domingo. Caballero cifrou en máis de 200 as saídas dos corpos municipais. Entre as consecuencias do mal tempo destacou a inundación do aparcadoiro de Fernando El Católico, ademais de elementos caídos ou en risco de caer en distintas fachadas de edificios.

Iolanda Veloso anima a participar no programa "Camiña con nós pola igualdade", co obxectivo de previr a violencia

luns, 4 out 2010

A concelleira de Igualdade, Iolanda Veloso, presentou este luns a sexta edición do programa "Camiña con nós pola igualdade", que na convocatoria pasada se desenvolveu en 43 centros educativos da cidade. Iolanda Veloso destacou a importancia da educación "para previr a violencia" polo que convidou aos centros escolares a seguir sumándose a esta iniciativa, que ten aberto o prazo de inscrición ata o 20 de outubro.

Vigo acolleu o pasado sábado a presentación do iOn e o C-Zero, coches eléctricos de PSA

luns, 4 out 2010

O alcalde, Abel Caballero, e o tenente de alcalde, Santi Domínguez, entre outros integrantes do goberno local, asistiron o pasado sábado á presentación na planta de Vigo de PSA Peugeot Citroën dos modelos eléctricos do grupo, o Peugeot iOn e o Citroën C-Zero, xa á venda. A posta de largo, á que acudiron representantes de varias administracións públicas, producíuse poucos días despois de que o grupo automobilístico confirmara que a factoría de Balaídos comezará a producir a finais de 2012 dous vehículos comerciais eléctricos.