O Concello aprobou 2.108 axudas de emerxencia desde xaneiro
A comisión de axudas de emerxencia do Concello de Vigo aprobou na reunión desta semana un total de 90 novas axudas, por un importe de 20.000 euros. Así o explicou hoxe o alcalde ao avanzar que desde xaneiro foron concedidos 2.108 apoios, e insistir en reclamar a compatibilidade da percepción do Ingreso Mínimo Vital coa Renda de Inclusión Social da Xunta de Galicia.
Abel Caballero explicou hoxe que das 90 axudas de emerxencia aprobadas polo Concello esta semana, 24 foron destinadas para o pago de alugueiros, evitando o deshaucio dun importante número de persoas. Incidiu en que entre os apoios importantes, un total de 25, tamén se atopan os destinados a alimentación. A estes hai que sumar outras 21 axudas para afrontar o abono do recibo da auga.
O rexedor indicou que desde xaneiro a administración local de Vigo aprobou 2.108 axudas, que representan “2.108 necesidades atendidas desde as axudas de emerxencia”. Recalcou que a axuda municipal é compatible co ingreso mínimo vital. “Desde aquí sigo dicindo que a Renda de Inclusión Social de Galicia ten que seguir sendo compatible co Ingreso Mínimo Vital, e non pode ser que a Xunta de Galicia faga caixa a cargo das persoas que o necesitan negando a compatibildade do Ingreso Mínimo Vital e da Risga que se fai noutras comunidades autónomas”.