Escoitar

Vigo celebra o día de Rosalía con poemas e paseos virtuais

Vigo conmemora este 24 de febreiro o nacemento de Rosalía de Castro con recitado dos seus poemas en distintas linguas -coa colaboración de profesorado e alumnado de colexios e da Universidade-, coa proxección dos seus textos nos autobuses urbanos e cun paseo literario virtual polo Vigo da autora. “Sempre que se trate de Rosalía, Vigo vai estar presente”, manifestou Abel Caballero.

mércores, 24 feb 2021
Abel Caballero presentou os actos este mércores en rolda de prensa telemática
Abel Caballero presentou os actos este mércores en rolda de prensa telemática

Segundo trasladou este mércores o alcalde, a cidade celebra o día de Rosalía de Castro coincidindo co seu nacemento un 24 de febreiro, unha efeméride que, por mor da pandemia, terá que ser vivida principalmente de forma telemática. O Concello, segundo afirmou Caballero, recorda a figura dunha escritora que supuxo “unha revolución para Galicia, para a lingua galega”, que publicou en Vigo Cantares gallegos, a súa obra central, un 17 de maio de 1863. “Por iso sentímonos tan vencellados a Rosalía”, valorou.

O alcalde relatou as propostas municipais programadas para o Día de Rosalía. A canle de YouTube do Concello de Vigo alberga desde o mediodía o recitado de poemas da autora en diferentes linguas, entre as que se atopa o alemán, o checo ou o chinés, entre outros, “poñendo de relevo a universalidade de Rosalía”, manifestou. Para esta acción, contouse coa colaboración da Fundación Rosalía de Castro, da Biblioteca municipal Neira Vilas e do profesorado e alumnado da Escola Oficial de Idiomas e dos colexios Don Bosco, da EPA do Berbés, o Salesianos, o Otero Pedrayo, as Calasancias, o Pintor Laxeiro e o Vicente Risco, ademais de estudantes do programa Erasmus na Universidade de Vigo.

Ademais, as pantallas dos autobuses urbanos da cidade proxectarán ata o 3 de marzo poemas de Rosalía e tamén os versos que Curros Enríquez e Ramón Cabanillas adicaron á poetisa. Por último, o Concello organiza un paseo literario virtual polo Vigo de Rosalía, a través da app Vigo e da páxina web municipal, no apartado do servizo de Normalización Lingüística. “Sempre que se trate de Rosalía, Vigo vai estar presente”, concluíu o alcalde, por ser “parte central da historia de Vigo e de Galicia”.

Descargar todas as imaxes