venres, 25 xuño 2010

O alcalde confirma que o plan de Moneo para a Praza do Rei "segue adiante" e "sen custo para a cidadanía"

Abel Caballero, requerido polos medios de comunicación, afirmou este venres que o proxecto do arquitecto Rafael Moneo para a Praza do Rei "segue adiante" e actualmente estanse a preparar os pregos económico e xurídico para o concurso administrativo. O plan, recordou o alcalde, "é viable e sen custe para a cidadanía". Caballero informou tamén da aprobación dun gasto de 345.000 euros para arranxos no edificio do Concello.

Caballero cifra en 1.300 os empregos creados nos dous últimos anos polo Plan Municipal "Imos Traballar"

venres, 25 xuñ 2010

A Xunta de Goberno Local, segundo informou este venres o alcalde, adxudicou a contratación de profesionais para o asesoramento do programa municipal "Imos Traballar", un dos catorce que ten en marcha a Concellería de Promoción Económica e Emprego. Aos 1.300 empregos creados en 2008 e 2009 súmase a expectativa apuntada polo socialista de acadar o mesmo número en 2010 e 2011.

Santi Domínguez presenta unha guía de recursos para favorecer a integración en Vigo das persoas estranxeiras

venres, 25 xuñ 2010

O tenente de alcalde, Santi Domínguez, e a concelleira de Benestar Social, presentaron este venres a "Guía de información e acollida para persoas de procedencia estranxeira". Os nacionalistas salientaron que a edición desta ferramenta trata de dar solución ás demandas de información das persoas que chegan a Vigo co obxectivo de facer unha cidade máis igualitaria e acadar a plena integración do colectivo emigrante.

Xulio Calviño participa na presentación do primeiro Simposio Internacional de innovación nos produtos pesqueiros

venres, 25 xuñ 2010

O concelleiro municipal participou este venres na presentación pública do evento organización por Anfaco Cecopesca, que reunirá en Vigo a numerosos e recoñecidos investigadores internacionais. Calviño subliñou a "iniciativa" da entidades viguesas "na procura da innovación, a competitividade e a excelencia", como amosa a organización deste Simposio, e salientou que Vigo volva acoller acontecementos de interese internacional.

O Museo de Castrelos propón para o vindeiro domingo o obradoiro "Landriña viaxa ao interior das paisaxes"

venres, 25 xuñ 2010

A nova edición do programa para familias "Domingos de museo", que se celebrará no Museo de Castrelos o vindeiro 27 de xuño, terá por título "Landriña viaxa ao interior das paisaxes", segundo informa o concelleiro de Patrimonio Histórico, Eudosio Álvarez. O obxectivo desta iniciativa, de carácter gratuíto, consiste en dar a coñecer o Museo da Cidade a todos os públicos, polo que se dirixe especialmente aos nenos e nenas entre 4 e 12 anos, que tamén poden participar acompañados polos seus familiares.

O Consello Municipal de Inmigración apoia a construción do centro de emerxencia social na ubicación elixida

venres, 25 xuñ 2010

O Consello Municipal de Inmigración, celebrado onte xoves, aprobou unha declaración de respaldo á construción do Centro Social de Atención Continuada de Vigo, cuxo proxecto recentemente presentaron a Tenencia de Alcaldía e a Concellería de Benestar Social. No texto se fai especial fincapé na necesidade que ten unha cidade como Vigo de atender ás persoas en situación de exclusión social.

Xuventude entregou a Daniel Gómez o premio do concurso de fotografía con móbil "Inter Rail 2010" sobre deportes urbanos

venres, 25 xuñ 2010

O Punto Xove da Concellería de Xuventude acolleu o pasado mércores a entrega do premio ao gañador do concurso de fotografía de móbil "Inter Rail 2010", Daniel Gómez Flores pola súa fotografía titulada "Embustero y bailarín". O gañador foi agasallado con dous billetes Inter Rail na modalidade "Global Pass Flexi", que xunto á persoa que elixa lle permitirá percorrer en tren diferentes países europeos.